Türkiyə Prezidenti Rəcəb Tayyib Ərdoğan rəsmi Ankaranın İrana qarşı davam edən hərbi əməliyyatlarla bağlı mövqeyinin "çox aydın" olduğunu bildirərək, ölkəsinin hər zaman sülhün tərəfdarı olduğunu vurğulayıb.
Prezident atəşkəs səylərinə toxunaraq gərginliyi azaltmaq və tərəfləri yenidən danışıqlar masasına qaytarmaq üçün intensiv diplomatik fəaliyyət göstərdiklərini qeyd edib. O, bölgədəki "yanğını" söndürməyin vacibliyini diqqətə çatdırıb.
Prezident R.T. Ərdoğan İsrail hökumətinin siyasətini də sərt şəkildə tənqid edib. O, İsrail xalqının belə Benyamin Netanyahunu "Holokostdan bəri baş vermiş ən böyük fəlakət" kimi xarakterizə etdiyini bildirib.
Xatırladaq ki, fevralın 28-dən etibarən ABŞ və İsrailin İrana qarşı başlatdığı birgə hava hücumları bölgədə gərginliyi yüksək həddə çatdırıb.
Bu hücumlar nəticəsində İranın ali dini lideri Əli Xamenei və 150-dən çox məktəbli qız da daxi olmaqla 1300-dən çox insan həyatını itirib.
Tehran administrasiyası bu zərbələrə cavab olaraq İsrail, İordaniya, İraq və ABŞ qüvvələrinin yerləşdiyi Körfəz ölkələrindəki müxtəlif hərbi hədəfləri PUA və raketlərlə atəşə tutub.
