Donald Tramp yanvarın 3-də bildirib ki, rəsmi Vaşinqton Venesuelaya qarşı “böyük miqyaslı hücum” həyata keçirib və bu əməliyyat nəticəsində Venesuela dövlət başçısı Nikolas Maduro və həyat yoldaşı saxlanılaraq ölkədən çıxarılıb.
ABŞ prezidenti “Truth Social” platformasında paylaşdığı açıqlamada deyib:
“Amerika Birləşmiş Ştatları Venesuelaya və onun lideri olan prezident Nikolas Maduroya qarşı uğurla genişmiqyaslı hücum həyata keçirdi. Onun həyat yoldaşı və o, saxlanılaraq ölkədən çıxarıldı.”
D.Tramp bildirib ki, əməliyyat ABŞ hüquq-mühafizə orqanları ilə əməkdaşlıq şəraitində icra olunub.
ABŞ prezidenti əməliyyatın təfərrüatlarının daha sonra açıqlanacağını, mətbuat konfransının isə Florida ştatında yerləşən “Mar-a-Lago” iqamətgahında saat 11:00-da keçiriləcəyini deyib.
Bundan əlavə, D.Tramp “The New York Times” (NYT) qəzeti ilə qısa telefon müsahibəsində hücumun uğurunu yüksək qiymətləndirərək deyib:
“Çox yaxşı planlaşdırma, çox-çox yaxşı əsgərlər və möhtəşəm insanlar var idi. Açığı, bu parlaq bir əməliyyat oldu.”
Əməliyyat üçün Konqresdən icazə alınıb-alınmadığı və Venesuela ilə bağlı növbəti addımların nədən ibarət olacağı sualına D.Tramp bu məsələlərin mətbuat konfransında açıqlanacağını söyləyib.
N.Maduro ABŞ nəzarətində
Hadisəylə bağlı ABŞ dövlət katibinin müavini Kristofer Landau N.Maduronun “nəhayət törətdiyi cinayətlərə görə ədalət qarşısında cavab verəcəyini” bildirib.
K.Landau “X” sosial şəbəkəsində paylaşım edərək yazıb:
“Venesuela üçün yeni bir sübh! Zülmkar getdi. O, nəhayət, cinayətlərinə görə ədalətlə üzləşəcək.”
Qeyd edək ki, ABŞ-nin Venesuelaya hücumları rəsmi Vaşinqtonun N.Maduronu narkotik qaçaqmalçılığı ilə əlaqələndirdiyi və aylarla davam edən gərginlikdən sonra baş verib.
“CBS News” rəsmi mənbələrə istinadla bildirib ki, N.Maduronun saxlanılması əməliyyatını ABŞ ordusunun xüsusi təyinatlı bölməsi “Delta Force” həyata keçirib.
ABŞ senatoru Mayk Li isə deyib ki, ABŞ dövlət katibi Marko Rubio ona N.Maduronun ABŞ-də cinayət ittihamları ilə mühakimə olunmaq üçün saxlanıldığını bildirib.
“N.Maduro artıq ABŞ nəzarətində olduğuna görə Venesuelada əlavə əməliyyat gözlənilmir”, - deyə M.Li qeyd edib.
Venesuelanın vitse-prezidenti Delsi Rodriges isə prezident N.Maduronun harada olduğu barədə “məlumatsız olduqlarını” bildirərək Donald Trampdan onun sağ olduğuna dair sübut tələb edib.
