Şimali Koreya höküməti ABŞ ilə mümkün yeni danışıqlardan əvvəl Vaşinqton rəhbərliyindən ölkənin nüvə silahına sahib dövlət kimi tanınmasını tələb edib. Açıqlama Koreya Xalq Demokratik Respublikasının başçısı Kim Çen Inın bacısı və Koreya Fəhlə Partiyası Mərkəzi Komitəsinin sədr müavini Kim Yo Conq tərəfindən verilib.
Koreya Mərkəzi Xəbər Agentliyi (KCNA) xəbər verir ki, Kim Yo Conq iyulun 29-da (bu gün) yayımladığı bəyanatda rəsmi Pxenyanın nüvə statusunun artıq dəyişməz bir reallıq olduğunu vurğulayıb.
“Koreya Xalq Demokratik Respublikasının nüvə silahı sahibi olan dövlət kimi geri dönməz statusunun və strateji imkanlarının, eləcə də dəyişmiş geosiyasi şərtlərin tanınması, istənilən gələcək proses üçün ilkin şərtdir”, – deyə o bildirib.
Kim Yo Conq ABŞ administrasiyasının Pxenyan rəhbərliyi ilə yenidən danışıqlara başlamaq niyyətini keçmişin birtərəfli yanaşması kimi qiymətləndirib. O qeyd edib ki, 2025-ci il nə 2018-dir, nə də 2019.
Açıqlamadakı 2018-ci ildə Sinqapurda, 2019-cu ildə Hanoyda və həmin ilin ortalarında demilitarizasiya zonasındaki (DMZ) tarixi görüşlərə istinad olunub.
Xatırladaq ki, ABŞ prezidenti Donald Tramp bu görüşlərdə Kim Çen In ilə birbaşa müzakirələr aparmış, 2019-cu ildə isə Şimali Koreya ərazisinə daxil olan ilk vəzifədəki ABŞ prezidenti olmuşdu.
Kim Yo Conq D.Tramp ilə Kim Çen In arasındakı şəxsi münasibətlərin “pis olmadığını” desə də, ABŞ-ın nüvəsizləşdirmə siyasətində israrlı davranmasının münasibətləri pozacağını bildirib.
Bəyanatın sonunda o qeyd edib ki, əgər ABŞ regiondakı dəyişiklikləri nəzərə almazsa və əvvəlki yanaşmasında israr etsə, Şimali Koreya ilə mümkün danışıqlar ancaq Vaşinqton rəhbərliyinin birtərəfli “ümidi” olaraq qalacaq.
