Ukrayna dövlət başçısı bildirib ki, ölkənin Milli Təhlükəsizlik və Müdafiə Şurasının rəhbəri Rüstəm Ömərov fevralın 26-da ABŞ elçiləri Stiv Vitkoff və Cared Kuşner ilə görüşəcək. Kiyevdə keçirdiyi mətbuat konfransında danışan Zelenski bu görüşün əsasən Ukrayna üçün bərpa və dəstək paketi, Rusiya ilə nəzərdə tutulan üçtərəfli danışıqlara hazırlıq və hərbi əsirlərin mübadiləsi məsələlərinə fokuslanacağını qeyd edib.

Zelenski görüşün harada keçiriləcəyi barədə məlumat verməsə də, ABŞ elçisi Stiv Vitkoff daha əvvəl Kuşnerlə birlikdə fevralın 26-da İsveçrənin Cenevrə şəhərində olacaqlarını və orada Ukrayna nümayəndələri ilə görüşə biləcəklərini ifadə etmişdi.

"Az öncə Rüstəm Ömərovla danışdım. Onun sabah amerikalı müzakirəçilər Vitkoff və Kuşnerlə görüşü var. Həmçinin bu dəfə Ömərovu ilk dəfə olaraq iqtisadiyyat naziri də müşayiət edəcək. Bu, Amerika tərəfi ilə ikitərəfli bir görüş olacaq", -deyə Zelenski vurğulayıb.

Ukrayna lideri martın əvvəlində keçirilməsi planlaşdırılan üçtərəfli danışıqlar üçün hazırlıqların prioritet olduğunu əlavə edib: "Ömərova verdiyim tapşırıq ikitərəfli danışıqların detallarını müzakirə etməkdir. Bu sahədə humanitar istiqamətdə müsbət nəticələr əldə edəcəyimizə ümid edirik".

Qeyd edək ki, ABŞ-nin vasitəçiliyi ilə keçirilən Rusiya-Ukrayna sülh danışıqlarının əvvəlki raundu 17-18 fevral tarixlərində Cenevrədə baş tutub.