İsrail oktyabrın 27-də işğal altındakı İordan çayının qərb sahilində keçirilən əməliyyat nəticəsində üç fələstinlinin öldürüldüyünü açıqlayıb.

İsrail polisinin məlumatına görə, üç nəfər Cenin yaxınlığındakı bir mağaradan çıxdıqları zaman güllələnib. Həmin mağaranın silahlıların fəaliyyət göstərdiyi “qaynar nöqtə” olduğu iddia edilib.

Rəsmi bəyanatda fələstinlilərin hücum planlaşdırdığı irəli sürülsə də, əlavə təfərrüatlar açıqlanmayıb. Qısa müddət sonra İsrail qüvvələrinin mağaranı məhv etmək məqsədilə hava hücumu təşkil etdiyi bildirilib.

İsrail ordusu hava hücumlarının həyata keçirildiyini təsdiqləsə də, əlavə məlumat verməyib.

İsrailin Qəzzaya zərbələr endirməyə başlamasından bəri işğal altındakı İordan çayının qərb sahilində 1057-dən çox fələstinli həlak olub, 10 300 nəfər yaralanıb, 1600-ü uşaq olmaqla 20 mindən çox insan isə həbs edilib.

Oktyabrın 22-də İsrail parlamenti işğal altındakı İordan çayının qərb sahilində və Maale Adumimdə qeyri-qanuni şəkildə inşa edilmiş yaşayış məntəqələrini ilhaq etməyi nəzərdə tutan iki qanun layihəsini təsdiqləyib.

2024-cü ildə Beynəlxalq Ədalət Məhkəməsi İsrailin İordan çayının qərb sahili də daxil olmaqla Fələstin ərazilərini işğal etməsini qanunsuz elan edib və işğal olunmuş ərazilərdə — o cümlədən Şərqi Qüdsdə — bütün yaşayış məntəqələrinin boşaldılmasına çağırıb.