"Türkiyə Dəmir Yolu Sektorunda İntermodal Daşıma Xidmətlərinin Gücləndirilməsi” (U-IMT) layihəsi iyunun 30-da başa çatıb Bu barədə Türkiyə Respublikasının Nəqliyyat və İnfrastruktur naziri Abdulkadir Uraloğlu sosial media platforması "NSosyal"dakı hesabında paylaşım edib.
Nazir A.Uraloğlu Türkiyə ilə Avropa İttifaqı arasında dəmir yolu yük daşımaları sahəsi üzrə əməkdaşlığından bəhs edərək bildirib ki, "Türkiyə Dəmir Yolu Sektorunda İntermodal Daşıma Xidmətlərinin Güçləndirilməsi” (U-IMT) layihəsinin bağlanış toplantısı Aİ-nin genişlənmə üzrə komissarı Marta Kosun iştirakı ilə keçirilib.
A.Uraloğlu etdiyi paylaşımda deyib: “Biz Orta Dəhlizin daşıma imkanlarını artıracaq ortaq hədəflər istiqamətində işlərimizi davam etdiririk. Bu layihə eyni zamanda Türkiyənin qlobal ticarətdəki strateji mövqeyini daha da möhkəmləndirəcək”.
Qeyd edilir ki, Aİ və Türkiyə tərəfindən birgə maliyyələşdirilən layihə xüsusi məqsədlə hazırlanıb. Layihənin məqsədi Türkiyə dəmir yolu sektorunda intermodal yük daşınması xidmətlərini inkişaf etdirməkdir. Eyni zamanda daha təhlükəsiz, ətraf mühitə zərər verməyən və balanslaşdırılmış daşıma sisteminə keçidi dəstəkləmək hədəflənir.
Layihə ilə həmçinin intermodal yük daşımaları üçün fəaliyyət planının hazırlanması nəzərdə tutulur. Bununla yanaşı, strateji infrastruktur ehtiyaclarının müəyyən edilməsi və Türkiyənin müvafiq nəqliyyat qurumlarının institusional potensialının gücləndirilməsi də hədəflər arasındadır.
Vurğulamaq lazımdır ki, Orta Dəhliz (digər adıyla Trans-Xəzər Beynəlxalq Nəqliyyat Marşrutu) alternativ ticarət yolu kimi böyük əhəmiyyət qazanıb. Bu dəhliz Türkiyə, Qafqaz və Mərkəzi Asiya üzərindən Asiya ilə Avropanı bir-birinə bağlayır.
Nazir A.Uraloğlu proqramda iştirak etdiyi üçün Aİ-nin nümayəndəsi Marta Kosa təşəkkür edərək Türkiyə-Aİ əməkdaşlığına verdiyi töhfələrə görə minnətdarlığını bildirib.
