Banqladeşin paytaxtı Dəkkə şəhərində döyüş təyyarəsinin məktəbə çırpılması nəticəsində əksəriyyəti uşaq olmaqla azı 27 nəfər həlak olub.

İyulun 21-də Banqladeş Hərbi Hava Qüvvələrinə məxsus F-7 BGI təlim təyyarəsi Dəkkənin Uttara bölgəsində kollec şəhərciyində qəzaya uğrayıb.

Səhiyyə və Ailə Rifahı Nazirliyinin baş məsləhətçisinin xüsusi köməkçisi Sayedur Rəhman bildirib ki, ölənlərin 25-i uşaqdır. Ölənlərdən bəzilərinin şəxsiyyətini müəyyən etmək üçün DNT testi tələb olunur. 170-dən çox insan müxtəlif dərəcəli yanıq xəsarətləri ilə xəstəxanalara çatdırılıb. Bəzi xəstələrin vəziyyəti son dərəcə ağır olaraq qalır.

Banqladeş ordusu iyulun 21-də verdiyi açıqlamada pilot, baş leytenant Tovkir İslamın adi təlim uçuşu zamanı təyyarədə "ehtimal ki, mexaniki nasazlıq yaşandığını" bildirib.

Açıqlamada "Dəqiq səbəb hələ araşdırılır" və pilotun təyyarəni əhalinin sıx olduğu bölgələrdən uzaqlaşdırmağa çalışsa da, iki mərtəbəli məktəb binasına çırpıldığı qeyd edilib.

Məhəmməd Yunusun müvəqqəti hökuməti iyulun 22-ni milli matəm günü elan edib.

Məhəmməd Yunus "X" platformasında etdiyi paylaşımda hadisə ilə bağlı "dərin kədər" duyduğunu ifadə edərək deyib: "Hərbi Hava Qüvvələrinin, Milestone Kollecinin tələbələri, valideynləri, müəllimləri və əməkdaşlarının və digərlərinin bu qəzadan zərər çəkdiyi itkilər bərpa olunmazdır. Bu, millətimiz üçün çox ağrılı bir məqamdır".