Qəzza Blokadasını Yarmaq üzrə Beynəlxalq Komitə,- İsrailin onlara qarşı istənilən vaxt müharibə cinayəti törədə biləcəyini gözlədiklərini açıqlayıb. Komitənin təşkilatçıları, Qəzzaya doğru yola çıxan “Qlobal Sumud” yardım donanmasının Misirin Aralıq dənizi sahilində yerləşən Marsa Matruh şəhərinin şimalına çatdığını bildiriblər.
Sentyabrın 28-də “X” platformasında verilən açıqlamaya görə, donanmanın bir neçə saat ərzində İskəndəriyyə şəhərinin şimalındakı sulara doğru yelkən açacağı gözlənilir.
"Qəzzaya yaxınlaşdıqca sionistlərin bizə qarşı istənilən anda müharibə cinayəti törədə biləcəyini gözləyirik”,-deyə açıqlamada bildirilib.
Donanmanın açıqlamasında qeyd edilib ki, lider gəmi OHWAYLA və ALL IN hazırda Qəzzaya cəmi 678 kilometr məsafədədir və təxminən 3-4 gün ərzində çatacağı gözlənilir. Yardım donanmasına yeni iki gəminin əlavə olunması ilə ümumi gəmi sayı 44-ə çatıb.
Açıqlamada həmçinin bildirilib: "Donanma cəmi iki gün ərzində yüksək riskli bölgəyə daxil olacaq. Qətiyyətimiz tamdır, lakin bu an qlobal həmrəylik və diqqətin ən çox tələb olunduğu andır".
Komitə daha əvvəl jurnalistlər və səhiyyə işçilərini daşıyan bir gəminin İsrail blokadası altındakı Qəzzaya göndəriləcəyini elan etmişdi.
Yola çıxacaq gəminin 1 oktyabr tarixində 100-dən çox beynəlxalq media nümayəndəsi və həkimi daşıyacağı qeyd olunub.
İsrailin müdaxiləsi ehtimalı
İsrailin dövlət yayımçısı KAN İsrailin yardım donanmasını əngəlləmək və nəzarət altına almaq üçün hazırlıq gördüyünü, donanmanın dörd gün ərzində Qəzzə sahillərinə çatmasının gözləndiyini, bu zamanın isə Yəhudi Yom Kippur bayramı ilə üst-üstə düşdüyünü xəbər verib.
Məlumata görə, İsrailin dəniz komandoları birliyi “Shayetet 13” son günlərdə "gəmiləri dənizdə ələ keçirmək" üçün təlimlər keçirib və bu təlimlərin "iştirakçılara zərərin minimuma endirilməsini" məqsəd qoyduğu iddia edilib.
İsrail həmçinin, donanmanın təşkilatçılarına humanitar yardımı Aşkelon limanı, Cənubi Kıbrıs (Kipr) və ya Vatikan vasitəsilə göndərməyi təklif etsə də, təşkilatçılar bu təklifi rədd edib. Tel-Əvivin bu hərəkəti məqsədli provokasiya hesab etdiyi bildirilir.
Əgər gözlənilən İsrail əməliyyatı baş verərsə, bu, iyun və iyul aylarında “Madleen” və “Handala” yardım gəmilərinin də qarşısının alınmasına bənzəyəcək.
Donanma Qəzzaya tətbiq olunan İsrail blokadasını qırmaq və xüsusilə tibbi ləvazimatların çatdırılması məqsədilə bu ayın əvvəlində yola çıxıb.
2024-cü il martın 2-dən bəri İsrail Qəzzanın keçid nöqtələrini tamamilə bağlayaraq ərzaq və yardım karvanlarını əngəlləyib və bölgədə aclıq şəraitini ağırlaşdırıb.
İsrailin işğalçı qüvvələri Qəzzaya gedən gəmiləri dayandırmaq, ələ keçirmək və fəalları ölkədən çıxarmaq kimi keçmişi var. Tənqidçilər bu cür əməliyyatları dəniz quldurluğu kimi qiymətləndirirlər.
İsrail ordusunun məlumatına görə, 2023-cü ilin oktyabrından bəri Qəzzada əksəriyyəti qadın və uşaq olmaqla 66 mindən çox fələstinli həlak olub. Davam edən bombardmanlar bölgəni yaşamaq üçün əlverişsiz edib, aclıq və xəstəliklərin yayılmasına səbəb olub.
