ABŞ-də ölkə üzrə məktəblər arası keçirilən akademik yarışmanın qalibləri yaxın vaxtlarda Türkiyəyə səfər edəcək.

Amerika Dünya İşləri Şuraları (WACA) tərəfindən təşkil edilən 24-cü “Academic World Quest” (Akademik Dünya Bilik Yarışı) bilik yarışmasının qalibləri 27-28 aprel tarixlərində baş tutan iki günlük tədbirdən sonra Vaşinqtondakı Milli Mətbuat Klubunda keçirilən mükafatlandırma mərasimində açıqlanıb.

ABŞ-nin İndiana ştatındakı Karmel Liseyinin şagirdləri ölkənin müxtəlif bölgələrindən qatılan komandaları geridə qoyaraq bu il birinci olublar.

Dörd nəfərdən ibarət qalib komandaya və onların müəlliminə “Türk Hava Yolları”nın Vaşinqton üzrə müdiri İsmayıl Öztürk tərəfindən İstanbula gediş-dönüş biletləri təqdim olunub.

Ötən il fərqli bir məktəbdən qalib olan şagirdlər də eyni sponsorluq çərçivəsində biletlərlə təmin edilmişdi.

Qeyd edək ki, yarışmada ümumilikdə 34 lisey komandası iştirak edib. Yarış çərçivəsində cari hadisələr, FIFA Dünya Kuboku və qəhvə ilə şokolad kimi əmtəə mövzuları da daxil olmaqla qlobal məsələləri əhatə edən 10 tur sual verilib.

Təşkil olunan yarışmanın məqsədi lisey şagirdləri arasında qlobal məsələlərə dair məlumatlılığın və anlayışın artırılmasıdır.