İşğal altındakı Şərqi Qüdsün sabiq baş müftisi və tanınmış müsəlman alimi Şeyx Əkrimə Sabri “Anadolu” agentliyinə müsahibəsində bildirib ki, İsrail rəsmiləri qarşıdan gələn İslamın müqəddəs ayı Ramazan boyunca müsəlmanların ibadət məqsədilə Məscidül-Əqsaya girişini məhdudlaşdırmağı planlaşdırır.
Şeyx Əkrimə Sabri eyni zamanda Qüds Ali İslam Şurasının sədri olaraq, Ramazan ayının müsəlmanların üçüncü ən müqəddəs məscidinə girişin məhdudlaşdırılması planından narahatlığını ifadə edib.
O qeyd edib ki, İsrailin niyyəti yanvar ayının ilk həftəsində işğal altındakı Şərqi Qüdsə yeni polis komandanı kimi general-mayor Avşalom Peledin təyin edilməsi ilə açıq şəkildə üzə çıxıb. Bu addımın ifrat sağçı Milli Təhlükəsizlik naziri İtamar Ben-Qvirin gərginliyə səbəb ola biləcək Məscidül-Əqsa planlarını irəlilətmək cəhdi kimi qiymətləndirildiyi bildirilir.
İsrailin “Haaretz” qəzeti yazıb ki, Ben-Qvirin gərginliyi daha da artırmaq üçün əlindən gələni etdiyi təəssüratı yaranır.
Şeyx Sabri bildirib ki, müsəlmanlar Həzrət Məhəmməd Peyğəmbərin Şaban ayının sonunda Ramazanı qarşılamaq ənənəsinə uyğun olaraq müqəddəs ayı nikbinliklə qarşılayırlar.
Lakin Qüds məsələsinə gəldikdə, işğalçı qurumların Məscidül-Əqsaya gələn müsəlmanlara qarşı sərt tədbirlər tətbiq etməsindən dərin təəssüf hissi keçirdiklərini vurğulayıb.
Sabri deyib ki, İsrail rəsmiləri çoxsaylı gəncin məscidə girişini qadağan edib və işğal altındakı İordan çayının qərb sahilindən gələn ibadətçilər üçün Ramazan boyunca tətbiq olunan məhdudiyyətlərin yumşaldılmayacağını elan ediblər.
Onun sözlərinə görə, bu vəziyyət daha sərt məhdudiyyətlər deməkdir və Məscidül-Əqsada ibadət edənlərin sayı əvvəlki illərlə müqayisədə daha az olacaq. Bu isə ibadət azadlığı ilə ziddiyyət təşkil edir və müsəlmanların oruc ibadətinə mənfi təsir göstərir.
Sərt məhdudiyyətlər
Adətən işğal altındakı İordan çayının qərb sahilindən yüz minlərlə fələstinli Ramazan ayında namaz qılmaq üçün işğal altındakı Şərqi Qüdsə və Məscidül-Əqsaya üz tutur.
Lakin İsrail 7 oktyabr 2023-cü ildə Qəzzada başlatdığı soyqırımdan sonra Baş nazir Benyamin Netanyahu hökuməti hərbi nəzarət-keçid məntəqələrində məhdudiyyətləri artırıb və İordan çayının qərb sahili sakinlərinin Şərqi Qüdsə girişini məhdudlaşdırıb.
Son iki il ərzində yalnız az sayda şəxsə İsrail ordusu tərəfindən xüsusi icazələr verilib. Fələstinlilər isə bu icazələrin alınmasının son dərəcə çətin olduğunu bildirirlər.
Bildirilir ki, İsrail dövlət rəsmiləri bu il Ramazan ayı ilə bağlı hər hansı xüsusi qaydaların tətbiq ediləcəyini açıqlamayıblar.
Lakin son günlər İsrail qurumları Şərqi Qüdsdə yaşayan yüzlərlə fələstinliyə müvəqqəti qadağalar tətbiq edərək onların Ramazan müddətində Məscidül-Əqsaya girişini qadağan ediblər.
Qeyd edilir ki, hətta bəzi hallarda bu qadağaların müddəti altı aya qədər uzadıla bilər.
İsrailin məqsədi
Bu tədbirlər Baş nazir Benyamin Netanyahu rəhbərliyindəki İsrailin ifrat sağçı hökumətinin, fələstinli rəsmilərin məkanın uzun müddətdir mövcud olan “status-kvo”sunda dəyişikliklər edildiyi barədə irəli sürdükləri ittihamlardan sonra həyata keçirilir.
Bununla yanaşı, yerli polis İslam Vəqfi İdarəsinin basqınların dayandırılması ilə bağlı təkrar çağırışlarına baxmayaraq, 2003-cü ildən etibarən israilli ifrat dindarların məscid həyətinə birtərəfli qaydada daxil olmasına icazə verir.
Məsələylə bağlı Şeyx Sabri deyir: “Heç bir şübhə yoxdur ki, sağçı hökumət Məscidül-Əqsa ilə bağlı təcavüzkar planını həyata keçirməyə çalışır. İllərdir açıq girişlər, açıq ibadət mərasimləri, dini ayinlərin icrası tələbləri irəli sürülür. Vaxtilə gizli saxlanılan niyyətlər indi açıq şəkildə ifadə olunur.”
O əlavə edib ki, uzun illərdir İsrailin məkan üzərində hakimlik qurmağa və İslam Vəqfinin səlahiyyətlərini azaltmağa çalışdığı barədə xəbərdarlıq edirlər.
Bununla belə, İsrailin tədbirləri təkcə Məscidül-Əqsa ilə məhdudlaşmır. Ümumilikdə işğal altındakı Şərqi Qüdsdə, xüsusilə məscidin ətrafında yerləşən fələstinli məhəllələrin sökülməsi siyasəti də davam etdirilir.
Sabri söküntü siyasətini irqçi, ədalətsiz, qanunsuz və qeyri-insani adlandıraraq bildirib ki, bu, Britaniya müstəmləkə dövründə Fələstində tətbiq olunmuş ədalətsiz siyasətin davamıdır.
Sonda o, ərəb və islam xalqlarını Qüdsdə yaşayan fələstinlilərə dəstək verməyə çağırıb, ərəb və müsəlman liderləri Qüds və Məscidül-Əqsa qarşısında öz məsuliyyətlərini yerinə yetirməyə səsləyib.
