ABŞ Prezidenti Donald Tramp oktyabrın 28-də Yaponiya Özünümüdafiə Qüvvələrinə “F-35” qırıcı təyyarələri üçün ilk raket partiyasının çatdırılmasını təsdiqlədiyini açıqlayıb.
Bu barədə Donald Tramp Tokio yaxınlığındakı Yokosuka dəniz bazasında, nüvə enerjisi ilə işləyən ‘’USS George Washington’’ təyyarədaşıyan gəmisindә xidmәt edәn Amerika hərbçilərinə müraciət edərkən bildirib.
Tramp raketlərin bu həftə ərzində təhvil veriləcəyini və vaxtından əvvəl hazır olacağını qeyd edib.
O, ABŞ-ın hərbi üstünlüyünü vurğulayaraq deyib: “Bundan sonra, əgər biz nə vaxtsa hәr hansı müharibədə iştirak etsәk, qalib gələcəyik’’.
Prezident ABŞ Hərbi Dəniz Qüvvələrinin gücünü yüksək qiymətləndirərək bildirib ki, heç bir digər donanma Amerikanınkına “ yaxın belə deyil”. Onun sözlərinə görə, ABŞ ən müasir avadanlıq, sursat, silah, raket və təyyarələr istehsal edir.
“Bizimki kimi ordu yoxdur. Başqa heç bir ölkənin bizimki kimi silahı yoxdur və çox tezliklə biz həmişəkindən daha güclü və təsirli olacağıq,” – deyə Tramp vurğulayıb.
O, həmçinin qeyd edib ki, qabaqcıl silahlarla yanaşı, ABŞ ordusunun əsas gücü onun şəxsi heyətindədir. “Əgər bu silahlardan istifadə etmək üçün düzgün insanlarınız yoxdursa, onların əhəmiyyəti o qədər də böyük deyil’’,-deyә Donald Tramp vurğulayıb.
Tramp bu fikirləri Asiya turu çərçivəsində Yaponiyanın Baş naziri Sanae Takaiçi ilə birlikdə Amerika qoşunlarını ziyarət edərkən səsləndirib.
Trampdan sonra ABŞ və Yaponiya əsgərlərinə müraciət edən Yaponiyanın Baş naziri Sanae Takaiçi bildirib ki, Yaponiya Asiya-Sakit Okean bölgəsində sülhə və sabitliyə “proqressiv şəkildə töhfə verməyə” davam edəcək.
Takaiçi Trampın çıxış etdiyi ‘‘USS George Washington’’ təyyarədaşıyan gəmisini bölgədə azadlıq və sülhün qorunmasının “simvolu” adlandırıb.
Baş nazir vurğulayıb ki, misli görünməmiş təhlükəsizlik mühitində Tokio müdafiə qabiliyyətlərini kökündən gücləndirəcək: “Bunu sarsılmaz qətiyyət və konkret hərəkətlə edəcəyik’’,-deyә Yaponiyanın Baş naziri qeyd edib.
Yaponiyanın ABŞ ilə müttəfiqliyini “çox güclü” adlandıran Takaiçi bu müttəfiqlik münasibətlərini daha yüksək səviyyələrə qaldırmaq niyyətindә olduğunu deyib.
Hazırda ABŞ-ın qarşılıqlı müdafiə müqaviləsi çərçivəsində Yaponiyada 50 mindən çox əsgər, eləcə də müxtəlif silah, sursat və hərbi bazası var.
