İsrail ordusu Suriyanın cənubundakı Quneytra vilayətinə növbəti dəfə qanunsuz daxil olaraq bir çobanı saxlayıb. Bu barədə Suriya mediası məlumat yayıb.
"Al-Ikhbariya" televkanalının xəbərinə görə, İsrail qüvvələri Quneytra vilayətinin cənub kənd təsərrüfatı zonasında yerləşən Əl-Rafid qəsəbəsinin qərbinə doğru irəliləyərək mülki şəxsi saxlayıb.
Sözügedən ərazi daha əvvəl də dəfələrlə İsrail qüvvələrinin oxşar müdaxilələrinə məruz qalıb. Telekanal avqustun 21-də Əl-Rafidin qərb hissəsində oxşar irəliləyişin qeydə alındığını bildirib.
Aylar ərzində Suriyanın cənub bölgəsi İsrail ordusunun reydlər, axtarışlar, həbslər və hərbi nəzarət-buraxılış məntəqələrinin qurulması da daxil olmaqla ardıcıl müdaxilə və hücumlarına səhnə olub.
Bu fəaliyyətlər 2024-cü ilin dekabrından sonra daha da intensivləşib. Həmin vaxt İsrail 1974-cü il Sərhədlərin Ayırılması haqqında Sazişin qüvvədən düşdüyünü bəyan edərək Suriya ilə bufer zonaya nəzarəti ələ keçirmişdi.
Hərbi irəliləyiş ABŞ-nin vasitəçiliyi ilə keçirilən danışıqlarla eyni vaxta təsadüf edib
Suriya Ərəb Xəbər Agentliyinin (SANA) məlumatına görə, quru əməliyyatı yüksəksəviyyəli Suriya və İsrail nümayəndə heyətlərinin İordaniyada ABŞ-nin vasitəçiliyi ilə bir araya gəldiyi və son hücumlar fonunda gərginliyi azaltmağı hədəflədiyi danışıqlar zamanı baş verib.
Xarici işlər naziri Əsəd əş-Şeybaninin rəhbərlik etdiyi və kəşfiyyat rəhbərlərinin də yer aldığı Suriya nümayəndə heyəti İsrailin hücumlarını, həbsləri və bufer zonaya müdaxilələrini dayandıracaq praktiki mexanizmlərin yaradılmasına, eləcə də təhlükəsizlik paktının bərpasına diqqət yetirib.
Müzakirələr zamanı Dəməşq Suriyanın suveren dövlət olduğunu, öz milli ordusunu yenidən təşkil etmək və hər hansı məhdudlaşdırıcı mexanizm olmadan tərəfdaşlıqlarını müəyyənləşdirmək hüququna malik olduğunu vurğulayıb.
Suriya tərəfi işğal altındakı Qolan təpələrinin Suriya torpağı olduğunu bir daha bəyan edərək, əsas tələbin İsrail qüvvələrinin 8 dekabr 2024-cü ildən əvvəlki xətlərə çəkilməsi və 1974-cü il Sərhədlərin Ayırılması haqqında Sazişin tam şəkildə bərpa edilməsi olduğunu diqqətə çatdırıb.
