ABŞ Prezidenti Donald Tramp İranla hazırda qüvvədə olan atəşkəs rejimini uzatmaq niyyətində olmadığını bəyan edərək münaqişədə həlledici məqamın yaxınlaşdığına işarə edib. ABC News-un müxbiri Conatan Karla müsahibə verən Tramp, atəşkəsin müddətini uzatmağı zəruri hesab etmədiyini bildirib.
Donald Tramp yaxın vaxtlarda ya böyük bir diplomatik irəliləyişin, ya da gərginliyin kəskin artacağını gözlədiyini qeyd edib.
Tramp münaqişənin iki yolla — ya danışıqlar masasında, ya da İranın hərbi potensialını sarsıdacaq əməliyyatla yekunlaşa biləcəyini vurğulayıb. O, ölkənin yenidən qurulmasına imkan yaradacaq bir razılaşmaya üstünlük verdiyini vurğulayıb.
ABŞ-ın vitse-prezidenti Cey Di Vens bildirib ki, Vaşinqton yalnız İranla məhdudlaşan dar çərçivəli deyil, daha geniş və hərtərəfli bir sazişin əldə olunmasında maraqlıdır. Vensin sözlərinə görə, təxminən bir həftədir davam edən kövrək atəşkəs rejimi hələ də qüvvədədir və bu zəmində danışıqlar prosesi davam edir.
