ABŞ-ın Nyu-Cersi ştatında leysan yağışların səbəb olduğu daşqınlar iki nəfərin həyatına son qoyub. Təbii fəlakət zamanı bir çox avtomobil və metro stansiyası su altında qalıb.

Leysan yağışları hava limanlarında, əsas magistral yollarda və dəmir yolu nəqliyyatında ciddi fasilələrə səbəb olub. Nyu-York şəhərinin meri Erik Adamsın sözlərinə görə, Manhettenin Mərkəzi Parkında cəmi bir saat ərzində 5 santimetrdən çox yağıntı qeydə alınıb.

Sosial şəbəkələrdə yayılan görüntülərdə Manhettenin qərbində yerləşən metro stansiyası da daxil olmaqla, bir çox metro stansiyalarının su altında qaldığı görünür. Rəsmilər yağıntının qısa müddətdə metro sistemini sıradan çıxardığını bildiriblər.

Nyu-York şəhərinin Ətraf Mühitin Mühafizəsi Departamentinin rəsmisi Rohit Aqarvala bildirib ki, şəhərin köhnə kanalizasiya sistemi bu cür güclü yağıntıya tab gətirə bilmir. Mer Erik Adams isə bu miqyasda yağıntının daha əvvəl qeydə alınmadığını vurğulayıb.

Nyu-Cersi ştatının qubernatoru Fil Merfi fövqəladə vəziyyət elan edib. Onun sözlərinə görə, Plainfild şəhərində su altında qalmış avtomobildə iki nəfərin meyiti aşkarlanıb.