Rusiya Prezidenti ABŞ-nin Müstəqillik Günü münasibətilə Prezident Trampı təbrik edərək münasibətlərin gücləndirilməsi çağrısını edib.
Rusiya Prezidenti Vladimir Putin "ən böyük iki nüvə gücü" olaraq Rusiya və Amerika Birləşmiş Ştatlarının qlobal təhlükəsizlik məsələsində müştərək bir məsuliyyət daşıdığını bildirib.
Kreml tərəfindən yayılan məlumata görə, Putin ABŞ Prezidenti Donald Trampa ABŞ-nin müstəqilliyinin 250-ci ildönümü münasibətilə ünvanladığı məktubda Müstəqillik Bəyannaməsinin imzalanmasının təkcə ABŞ-nin doğuluşunu deyil, eyni zamanda "dünya tarixində də mühüm bir dönüş nöqtəsini" təmsil etdiyini qeyd edib.
Rusiyanın "Şimali amerikalı koloniyaçı güclərin Britaniya hökmranlığına qarşı apardıqları azadlıq mübarizəsini qeyd-şərtsiz dəstəklədiyini" ifadə edən Putin Moskva və Vaşinqtonun hər iki dünya müharibəsində də müttəfiq olduğunu xatırladıb.
Putin deyib: "İki dünya müharibəsində müttəfiq idik, bəşəriyyəti faşizm dəhşətindən birlikdə xilas etdik və ardınca müasir dünya nizamının əsaslarının qoyulmasında həyati rol oynadıq. Hazırda da Rusiya və Amerika Birləşmiş Ştatları ən böyük iki nüvə gücü olaraq qlobal miqyasda təhlükəsizlik və sabitliyin təmin edilməsində xüsusi məsuliyyət daşıyır".
Moskva ilə Vaşinqton arasında "konstruktiv, bərabərhüquqlu və qarşılıqlı faydaya əsaslanan" münasibətlərin qurulmasının vacibliyini vurğulayan Putin bu addımların həm hər iki ölkənin, həm də ümumilikdə beynəlxalq birliyin maraqlarına xidmət edəcəyinə inandığını bildirib.
