Türkiyə Prezidenti Rəcəb Tayyib Ərdoğan və Oman Sultanı Heysəm bin Tariq arasında telefon danışığı baş tutub. Türkiyə Prezidenti Administrasiyasının İctimaiyyətlə Əlaqələr İdarəsindən verilən məlumata görə, liderlər ikitərəfli münasibətləri və regional prosesləri müzakirə ediblər.
Prezident R.T.Ərdoğan söhbət zamanı İrana qarşı hücumların və Tehranın regiondakı qonşu ölkələrə qarşı ehtimal olunan qisas tədbirlərinin bölgəni görünməmiş bir təhlükəsizlik böhranı ilə üz-üzə qoyduğunu diqqətə çatdırıb. O, həmçinin Omana qarşı yönəlmiş hücum cəhdlərinin qəbuledilməz olduğunu vurğulayıb.
R.T.Ərdoğan mövcud gərginliyə baxmayaraq Türkiyənin vasitəçilik də daxil olmaqla bütün diplomatik təşəbbüsləri davam etdirəcəyini qeyd edib.
R.T.Ərdoğan həmçinin İsrailin Baş naziri Benyamin Netanyahu hökumətinin işğal altındakı Şərqi Qüdsdə yerləşən Əl-Əqsa məscidinə müsəlmanların girişini məhdudlaşdırmasını "qəbuledilməz" adlandırıb. Qəzza xalqının humanitar yardıma ehtiyacı olduğunu xatırladan Türkiyə lideri, iki dövlətli həll variantına nail olmaq üçün Sülh Komissiyasının fəaliyyətinin mütləq davam etdirilməli olduğunu bildirib. Prezident Ərdoğan həmçinin Heysəm bin Tariqi Ramazan bayramı münasibətilə təbrik edərək xoş arzularını çatdırıb.
