Azərbaycanın Qəbələ şəhərində keçirilən Türk Dövlətləri Təşkilatının (TDT) 12-ci Zirvəsində çıxış edən Türkiyə prezidenti Rəcəb Tayyib Ərdoğan Suriya, Cənubi Qafqaz və mədəni təşəbbüslərlə bağlı əməkdaşlığa diqqət çəkərək, bölgədə daha fəal rol oynamağa çağırış edib.

Prezident R.T.Ərdoğan çıxışında deyib: “Türk dünyasının bölgəmizin sabitliyi və təhlükəsizliyində bir çox baxımdan daha təsirli rol oynaya biləcəyinə inanırıq. Birləşmiş Millətlər Təşkilatının Təhlükəsizlik Şurası bəşəriyyətin vicdanını yaralayan bir çox məsələyə biganə qalır. Biz belə bir beynəlxalq sistemlə üz-üzəyik”.

Suriyadakı vəziyyətə də toxunan Türkiyə prezidenti R.T.Ərdoğan deyib: “Çoxsaylı çətinliklərə baxmayaraq, Suriya hökumətinin son doqquz ayda əldə etdiyi irəliləyiş gələcəyə ümidlə baxmağımıza imkan yaradır. Türk dövlətləri olaraq Suriya hökuməti ilə əməkdaşlığı inkişaf etdirməliyik”.

Həmçinin Cənubi Qafqazla bağlı mövzuya da münasibət bildirən ölkə başçısı deyib: “Biz Cənubi Qafqazdakı prosesləri sadəcə izləməklə kifayətlənmirik, bölgədə sülh və sabitliyin təmin olunması istiqamətində atılan addımları səmimiyyətlə dəstəkləyirik”.

Bundan başqa, İsrailin Qətərə qarşı son hücumlarını kəskin şəkildə pisləyən R.T.Ərdoğan əlavə edib ki, bölgənin sabitliyinə ən böyük təhlükə məhz bu ölkənin mövcud rəhbərliyindən qaynaqlanır.

Sonda isə Türkiyə prezidenti ortaq mədəni layihələrdən də danışıb: “Ortaq əlifba mövzusunda Türkiyə olaraq ilk addımı atırıq. Dünya şöhrətli qırğız yazıçısı Çingiz Aytmatovu əks etdirən bir əsər və “Oğuznamələr”i ortaq əlifba ilə çap edirik”.

Tədbirdə Türkiyə xarici işlər naziri Hakan Fidan da çıxış edib

Türkiyənin xarici işlər naziri Hakan Fidan Qəbələdə keçirilən Türk Dövlətləri Təşkilatının Xarici İşlər Nazirləri Şurasının iclasında çıxış edib. O bildirib ki, uzunmüddətli sabitlik ancaq Türk dövlətləri arasında gücləndirilmiş əməkdaşlıq və koordinasiya ilə təmin oluna bilər.

Nazir H.Fidan çıxışında deyib: “Türk dünyası artıq regional balansları müəyyən edən əsas aktora çevrilməlidir. Türk Dövlətləri Təşkilatının ən böyük gücü üzvlər arasında qarşılıqlı etimadın və əməkdaşlığın dərinləşməsidir”.

Nazirin sözlərinə görə, bölgəsəl və qlobal çağırışlar qarşısında Türk dünyası daha tez-tez bir araya gəlməli, hansı addımların atılacağını vaxtında müzakirə etməlidir.

Hakan Fidan Şimali Kipr Türk Cümhuriyyətinin (ŞKTC) 2022-ci ildə Türk Dövlətləri Təşkilatında müşahidəçi statusu qazanmasının əhəmiyyətini xatırladaraq deyib: “Bu, Türk dünyasının birliyini gücləndirdi. Türk dünyasının ayrılmaz parçası olan Kipr türklərinin üzləşdiyi ədalətsiz təcridlər aradan qaldırılmalı və onların hüquqları tanınmalıdır. Bu, bizim ortaq məsuliyyətimizdir”.

Nazir həmçinin əlavə edib ki, Cənubi Qafqazda davamlı sülhün təmin olunması istiqamətində mühüm addımlar atılıb.