Türkiyə Xarici İşlər Nazirliyi Suriya, İordaniya və ABŞ arasında Suriyanın cənubundakı Sveyda əyalətində böhranın həlli məqsədilə razılaşdırılmış yeddi mərhələli yol xəritəsini alqışladığını bəyan edib. Nazirliyin yaydığı bəyanatda bu ifadələrə yer verilib:
"Suriyanın Sveyda əyalətində sülhün bərqərar olması, sabitliyin təmin edilməsi və qarşıdurmaların yenidən baş verməsinin qarşısını almaq məqsədilə açıqlanan yol xəritəsini alqışlayırıq’’.

Bəyanatda vurğulanıb ki, Türkiyə Suriyanın ərazi bütövlüyü, birlik və suverenliyinə hörmət prinsipləri əsasında bu ölkədə sülhün, təhlükəsizliyin və sabitliyin təmin olunması istiqamətində göstərilən beynəlxalq səyləri dəstəkləməyə davam edəcək.

Suriya Xarici İşlər Naziri Əsəd əl-Şeybani sentyabrın 16-da Dəməşqdə İordaniya xarici işlər naziri Ayman Safadi və ABŞ-ın Suriya üzrə xüsusi nümayəndəsi Tom Barak ilə keçirdiyi görüşdən sonra yol xəritəsinin detalları barədə məlumat verib.

Yeddi mərhələli plana Sveyda əyalətinə fasiləsiz humanitar və tibbi yardımın çatdırılması, əsas xidmətlərin bərpası, nəqliyyatın asanlaşdırılması məqsədilə yolların təhlükəsizliyinin təmin olunması və yerli təhlükəsizlik qüvvələrinin yerləşdirilməsi daxildir. Plan çərçivəsində həmçinin, münaqişə qurbanlarına kompensasiya ödənilməsi, yurd-yuvalarından didərgin düşənlərin geri qayıtmasına şərait yaradılması, itkin düşən şəxslərin taleyinə aydınlıq gətirilməsi və əyalətdəki bütün icmaları əhatə edən barışıq prosesinə start verilməsi planlaşdırılır. Bu təşəbbüs iyul və avqust aylarında İordaniyada keçirilən danışıqlardan sonra formalaşıb.

Xatırladaq ki, Sveydada iyulun 19-dan etibarən qüvvədə olan atəşkəs, druzlar ilə bədəvi qəbilələri arasında bir həftə davam edən silahlı toqquşmalardan sonra əldə olunmuşdu.