Myanmar xuntasının çevriliş əleyhinə döyüşçülərin nəzarətində olan bir kəndə hava hücumu nəticəsində azı 12 nəfər həlak olub. Yerli rəsmilərin verdiyi məlumata görə, bombardman zamanı mülki ərazilər hədəf alınıb.

Myanmar ordusu 2021-ci ildə çevriliş yolu ilə hakimiyyəti ələ keçirib və bu addım ölkəni vətəndaş müharibəsinə sürükləyib. Analitiklərə görə, çətin vəziyyətdə olan xunta getdikcə daha çox mülki şəxsləri hədəf alan hava hücumları həyata keçirir.

Cümə günü, günorta saatlarında baş verən hücum, ölkənin ikinci ən böyük şəhəri Mandalaydan təxminən 60 kilometr şimalda yerləşən Letpanhla kəndində törədilib. Kənd, hərbi çevrilişdən sonra silahlanan Xalq Müdafiə Qüvvələrinin (PDF) nəzarətindədir.

Yerli rəsmi “Hücum nəticəsində çox sayda adam həlak oldu. Hazırda siyahı hazırlayırıq, 12 nəfərin həlak olduğunu qeyd etdik,” - deyə məlumat verib.

Xalq Müdafiə Qüvvələri isə bombardman nəticəsində 27 nəfərin həyatını itirdiyini bildirib.

Hadisə şahidi, 62 yaşlı Myint Soe, bombardman zamanı gizlənməyə çalışdığını söyləyib. “Eyni anda böyük partlayış səsləri eşitdim. Çölə çıxıb bazarın olduğu əraziyə baxanda hər yerin yandığını gördüm. Hadisədən sonra ərazidəki binalar yanmağa başladı. Sivil geyimdə olan insanlar alovları söndürməyə çalışırdılar. Başından yaralanmış bir uşağın meyiti Xalq Müdafiə Qüvvələri tərəfindən təcili yardım maşınına yerləşdirildi,” - deyə o qeyd edib.

Hazırda Myanmar xunta qüvvələri, etnik silahlı qruplar və çevriliş əleyhinə qüvvələr tərəfindən idarə olunur. ACLED təşkilatının məlumatına görə, 2024-cü ildə təxminən 800 hava hücumu həyata keçirilib. Bu rəqəm əvvəlki ilə nisbətən üç dəfə daha çoxdur və ACLED xuntanın hava hücumlarına davam edəcəyini proqnozlaşdırır.

“Təhlükəsizliyin pozulması və müxalifətin dəstək bazasının zəiflədilməsi məqsədilə hərbi qüvvələr mülki əhalinin yaşadığı ərazilərə qarşı hava hücumlarını davam etdirəcək,” - deyə təşkilatın dekabr ayında yaydığı bəyanatda vurğulanıb.

2023-cü ilin sonlarında silahlı etnik qrupların ittifaqı tərəfindən həyata keçirilən hücumlar, xuntaya ciddi ərazi itkiləri yaşatdı. Lakin analitiklər bildirir ki, Rusiya texniki dəstəyi ilə fəaliyyət göstərən Myanmar Hərbi Hava Qüvvələri əsasən sərhəd bölgələrində olan rəqiblərinə qarşı mübarizədə əsas rol oynayır.

Hazırda 3,5 milyondan çox vətəndaş məcburi köçkün vəziyyətindədir və əhalinin yarısı yoxsulluq içində yaşayır.