Türkiyə prezidenti Rəcəb Tayyib Ərdoğan Qəzzaya humanitar yardım çatdırmaq üçün yola çıxan "Qlobal Sumud" humanitar yardım donanmasına qarşı İsrailin “quldurluğunu” pisləyib.

Ədalət və İnkişaf Partiyasının (AK) vilayət sədrlərinin toplantısında çıxış edən Ərdoğan "İsrail hökumətinin beynəlxalq sularda üzən mülki şəxslərə qarşı bu hücumu, soyqırım kadrının Qəzzada insanlığa qarşı cinayətlərini gizlətməyə çalışdığı çılğınlığı bir daha sübut etdi. Soyqırımçı Netanyahu hökuməti nəyinki sülhün bərqərar olması, belə bir ehtimalın belə mümkünlüyünə dözə bilməz” deyib.

Dövlət başçısı "Qlobal Sumud" donanmasının Qəzzadakı vəhşiliyi və İsrailin qatil üzünü bir daha dünyaya nümayiş etdirdiyini bildirib.

Ərdoğan "Çox çətin şərtlər altında həyatları və ləyaqətləri uğrunda mübarizə aparan fələstinli qardaş və bacılarımızı tərk etməyəcəyik. Atəşkəsin bərqərar olması, sülh və əmin-amanlığın hökm sürməsi üçün var gücümüzlə çalışmaya davam edəcəyik" deyib.

Türkiyə rəsmiləri donanma ilə bağlı hadisələri yaxından izlədiklərini və gəmidəki Türkiyə vətəndaşlarının hər hansı bir zərər görməməsi üçün tədbirlər gördüklərini bildiriblər.