ABŞ Prezidenti Donald Tramp İsrailin Baş naziri Benyamin Netanyahuya Türkiyə ilə olan fikir ayrılıqları mövzusunda məntiqli olmağın vacibliyini vurğulayıb. Donald Tramp Türkiyə Prezidenti Rəcəb Tayyib Ərdoğanla çox yaxşı münasibətlərinin olduğunu bildirib.

Bu barədə Donald Tramp İsrail Baş naziri Benyamin Netanyahunu qəbul etdiyi zaman jurnalistlərə verdiyi bəyanatda qeyd edib. Donald Tramp deyib: “Türkiyə ilə yaşadığınız problemləri həll edə biləcəyimi düşünürəm.”

ABŞ Prezidenti B.Netanyahuya müraciət edərək deyib: “Əgər Türkiyə ilə bir probleminiz varsa, bunu həll edə biləcəyinə inanıram. Mənim Türkiyə və onun liderləri ilə çox yaxşı münasibətlərim var. Bu problemin öhdəsindən gələ bilərik. Ona görə də ümid edirəm ki, bu bir problem olmayacaq.”

Donald Tramp həmçinin Prezident Rəcəb Tayyib Ərdoğanla yaxşı münasibətlərinin olduğunu vurğulayaraq onu sərt, lakin çox ağıllı bir lider kimi xarakterizə edib. D.Tramp Ərdoğanın heç kimin bacara bilmədiyi bir şeyi bacardığını qeyd edib. O, ötən ilin dekabrında Suriyanın keçmiş lideri Bəşər Əsədin devrilməsində Türkiyənin kritik rol oynadığına inandığını bir daha vurğulayıb.

Donald Tramp daha əvvəl səfirliyə namizədlərlə keçirdiyi görüşdə Türkiyəni “yaxşı ölkə”, Prezident Ərdoğanı isə “yaxşı lider” adlandırmışdı.