Rusiya-Ukrayna müharibəsi Qara dənizdə 120 min delfinin ölümünə səbəb olub. Bu barədə Ukraynanın cənubundakı Tuzla Limanı Milli Təbiət Parkının baş elmi işçisi İvan Rusev "Al Jazeera" telekanalına açıqlama verib. O, 2022-ci ilin fevral ayından bəri davam edən müharibənin Qara dənizdəki dəniz canlılarına ağır zərər vurduğunu bildirib.
Partlayışlar və raket atışları delfinlərin ovlamaq üçün istifadə etdiyi ekolokasiya qabiliyyətini pozur. Qidalana bilməyən delfinlər çəki itirirlər. Dəniz çirklənməsi də immunitet sistemini zəiflədir və ölümcül infeksiya riskini artırır. Buna görə də müharibə dövründə 120 min delfinin öldüyü təxmin edilir.
Müharibənin təsirləri qida zəncirinə yayılır
Hərbi əməliyyatlar zamanı dənizə qarışan yanacaq və kimyəvi maddələr də balıq populyasiyasını və dəniz ekosistemini təhdid edir. Mütəxəssislər balıqlarla qidalanan quşların da qida qıtlığı və partlayışların səbəb olduğu səs-küydən təsirləndiyini bildirirlər.
Mütəxəssislərin fikrincə, müharibənin dəniz canlıları və köçəri quşlar üzərindəki təsirləri hərbi əməliyyatlar başa çatdıqdan sonra da uzun müddət davam edə bilər.
