ABŞ Prezidenti Donald Tramp İranın Qətərdə yerləşən ABŞ hərbi bazasına təşkil etdiyi raket hücumunu “çox zəif” adlandırıb. Hücumun ABŞ-ın İranın əsas nüvə obyektlərinə endirdiyi hava zərbələrinə cavab olduğunu bildirən D.Tramp Vaşinqtona bu barədə əvvəlcədən məlumat verildiyini və indi bütün tərəfləri gərginliyi azaltmağa çağırdığını qeyd edib.

D.Tramp "Truth Social" platformasında etdiyi paylaşımda “Ola bilsin ki, İran indi regionda sülhə doğru irəliləyə bilər” deyərək İsraili də eyni addımı atmağa təşviq edəcəyini bildirib.

Yaxın Şərqdə ABŞ-ın ən böyük hərbi bazasına ev sahibliyi edən Qətər Əl-Udeid bazasını hədəf alan raketlərin hava hücumundan müdafiə sistemləri tərəfindən zərərsizləşdirildiyini açıqlayıb.

İranın dövlət mediası İnqilab Keşikçiləri Korpusunun bazanı altı raketlə hədəf aldığını bildirib. ABŞ rəsmiləri isə bazanın qısa və orta mənzilli ballistik raketlərlə vurulduğunu təsdiqləyiblər. Onlar hücumdan əvvəl bazanın boşaldıldığını da qeyd ediblər.

İranın Milli Təhlükəsizlik Şurasının yaydığı bəyanatda qeyd olunur ki, bu hücum, ABŞ-ın İranın nüvə obyektlərinə, xüsusilə “Fordo”dakı yeraltı obyektə endirdiyi zərbələrə adekvat cavabdır.

Qarşılıqlı hücumlar İsrailin İrana hərbi zərbə endirməsindən sonra başlayıb. Bazar günü ABŞ qüvvələrinin İranın “Fordo”, “Natanz” və İsfahandakı nüvə obyektlərini hədəf almasından sonra bölgədə gərginlik daha da artıb.

Hücumdan sonra Qətər rəsmiləri təhlükəsizlik vəziyyətinin sabit olduğunu açıqlayıblar. ABŞ səfirliyi də çərşənbə axşamı normal fəaliyyətin bərpa olunacağını bəyan edib.

İran hücumun “dost və qardaş” qonşusu Qətəri hədəf almadığını bildirsə də, rəsmi Doha bu hücumu pisləyib və mümkün cavab barədə xəbərdarlıq edib. Səudiyyə Ərəbistanı da hücumu pisləyərək Qətərə dəstəyini ifadə edib.