Cənubi Koreya prezidenti Yun Suk-Yol YTN telekanalının canlı yayımında hərbi vəziyyət elan edib. Yun ölkənin azad və konstitusional quruluşunu qorumaq üçün bu radikal addımı atmağa məcbur olduğunu bildirib. Müxalifət partiyalarını parlament prosesinə mane olmaqda ittiham edən Yun bu vəziyyətin ölkəni böhrana sürüklədiyini vurğulayıb.

Yun çıxışında vəziyyətin aktual olduğunu vurğulayaraq deyib: "Azad Koreya Respublikasını Şimali Koreyanın kommunist qüvvələrinin təhdidindən qorumaq, xalqımızın azadlığına kölgә salan Şimali Koreyapәrәst anti-dövlət qüvvələrini məhv etmək və azad konstitusional quruluşu müdafiə etmək üçün hərbi vəziyyət elan edirəm".

Lakin o, hökumətin hərbi vəziyyətin elan edilməsi ilə bağlı atmağı planlaşdırdığı konkret addımlar barədə ətraflı məlumat verməyib.

Yunun açıqlaması xüsusilə hazırda Cənubi Koreya Milli Assambleyasında çoxluğa sahib olan Demokratik Partiyasını hədəf alıb. Partiya bu həftə bir neçə aparıcı prokurorun istefaya göndərilməsini və hökumətin büdcə təklifini rədd edib. Yunun fikrincə, bu siyasi hərəkətlər hərbi vəziyyətin tətbiqini zəruri edən böhranın yaranmasına səbəb olub.