Türkiyənin xarici işlər naziri Hakan Fidan mayın 12-də Dohada Qətərin Baş naziri və xarici işlər naziri Məhəmməd bin Əbdürrəhman əl-Sani ilə görüş keçirib. Birgə mətbuat konfransında çıxış edən H.Fidan verdiyi açıqlamada Hörmüz boğazından "silah kimi" istifadə edilməməli olduğunu qeyd edərək, bu strateji su yolundakı fasilələrin həm regional sabitliyə, həm də qlobal iqtisadiyyata təhlükə yaradacağı ilə bağlı xəbərdarlıq edib.
H.Fidan deyib: "Körfəzdə davam edən gərginliklər Qəzza məsələsini unutdurmamalıdır."
Nazir H.Fidan həmçinin İsrailin ekspansionist siyasətinin regional "sabitlik və təhlükəsizlik" üçün böyük təhdid olmağa davam etdiyini də sözlərinə əlavə edib.
Məhəmməd əl-Sani isə Qətər və Türkiyənin Pakistanın ABŞ/İsrailin İrana qarşı 28 fevraldan bəri apardığı müharibəni dayandırmaq və Hörmüz boğazını yenidən açmaq məqsədilə həyata keçirdiyi vasitəçilik səylərini dəstəklədiyini bildirib. Həmçinin o, sabitliyin bərpası və strateji keçiddə hərəkət azadlığının təmin edilməli olduğunu vurğulayıb.
Məhəmməd əl-Sani deyib: "Qətər və Türkiyə (İrana qarşı) müharibəni dayandırmaq və Hörmüz boğazını yenidən açmaq üçün Pakistanın vasitəçilik səylərini dəstəkləyir.".
Qətərin xarici işlər naziri həmçinin Tehran rəhbərliyinin bu su yolundan Körfəz ölkələrinə qarşı "təzyiq və ya şantaj" vasitəsi kimi istifadə etməməli olduğunu bildirib.
Bundan əlavə, Məhəmməd əl-Sani Qəzza mövzusu barədə İsrailin atəşkəs rejimini pozmağa davam etdiyini və bölgədə humanitar yardımdan bir silah kimi istifadə etdiyini qeyd edib.
