Çin, Cənubi Koreya və Yaponiya azad ticarəti gücləndirmək barədə razılığa gəliblər. Üç ölkənin yüksək vəzifəli rəsmilərinin Seulda keçirilən görüşündən sonra birgə bəyanat yayılıb. Bazar günü keçirilən bu görüş, son beş ildə üç ölkənin nazirlər səviyyəsində keçirilən ilk görüşü olub. Görüş ABŞ Prezidenti Donald Trampın avtomobil və yük maşınları da daxil olmaqla müxtəlif məhsullara tətbiq etdiyi rüsumların qlobal ticarətə mənfi təsir etdiyi bir dövrdə baş tutub.

Cənubi Koreya və Yaponiya əsas avtomobil ixracatçıları olsa da, Çin də ABŞ-ın yeni rüsumlarından mənfi təsirlənib. Görüşdə Cənubi Koreyanın sənaye naziri Ahn Duk-geun, Yaponiyanın iqtisadiyyat, ticarət və sənaye naziri Yoji Muto və Çinin ticarət naziri Vanq Ventao iştirak ediblər. Üç ölkə, üçtərəfli azad ticarət sazişi üzrə danışıqların sürətləndirilməsinə çağıraraq, “proqnozlaşdırıla bilən ticarət və investisiya mühiti” yaratmaq barədə razılığa gəliblər.

Cənubi Koreyanın sənaye naziri Ahn Duk-geun üç ölkənin qlobal iqtisadi çağırışlara “birgə” cavab verməli olduğunu bildirib. O, "Bugünkü iqtisadi və biznes mühiti, qlobal iqtisadiyyatın getdikcə parçalanması ilə xarakterizə olunur" deyərək, birgə əməkdaşlığın vacibliyini vurğulayıb.

Qeyd edək ki, Donald Tramp aprelin 2-dən etibarən hər bir ticarət tərəfdaşına xüsusi tariflər tətbiq edəcəyini açıqlayıb.