İsrail amansız qətliamını davam etdirərkən Fələstinin Qəzza zolağının 30 faizini bufer zonaya çevirdiyini açıqlayıb və müharibədən əziyyət çəkən bölgəyə humanitar yardımın qarşısını almaq siyasətini davam etdirəcəyini bildirib.

İsrail ordusu aprelin 16-da yaydığı bəyanatda bildirib ki, Qəzza zolağında bir neçə əsas ərazi və marşrutlar üzərində tam əməliyyat nəzarəti yaradıb. Qəzza zolağının təxminən 30 faizi indi Əməliyyat Təhlükəsizliyi Bölgəsi olaraq təyin edilib. İsrail hava hücumları təxminən 1200 terrorçu hədəfi vurub və martın 18-dən bu yana 100-dən çox hədəfli əməliyyat keçirilib.

Qeyd edək ki, Müdafiə naziri İsrael Katz bu ay ordunun Qəzzanı "kiçik və daha təcrid hala gətirdiyini" deyib.

İsrail rəsmiləri dəfələrlə iddia ediblər ki, hərbi təzyiq HƏMAS-ı Qəzzada hələ də saxlanılan 58 girovu azad etməyə məcbur etməyin yeganə yoludur.

Qəzzaya humanitar yardım edilmir

Aprelin 16-da Fələstinin İslami Cihad qrupu israilli alman bir girovun videosunu yayıb. Videoda girov İsrail hakimiyyətini və ABŞ prezidenti Donald Trampı onun azadlığa buraxılmasını təmin etməyə çağırıb.

Onun ailəsi və İsrail mediası girovun Qüdsdən olan Rom Braslavski olduğunu bildirib.

Qəzzadakı qətliamla paralel olaraq HƏMAS qeyd edib ki, İsrail münsiflər vasitəsilə girovun azad edilməsini nəzərdə tutan 45 günlük yeni atəşkəs təklif edib.

Yayılan məlumata görə, Netanyahu aprelin 16-da girovlarla bağlı danışıqlar aparan şəxslər və təhlükəsizlik rəsmiləri ilə görüşüb və "girovların azad edilməsi üçün gələcək addımlar barədə göstərişlər verib.

HƏMAS bildirib ki, bu təklif həm də müharibəni tamamilə dayandırmaq üçün HƏMAS-ın tərksilah edilməsini nəzərdə tutur.

HƏMAS-ın yüksək rütbəli rəsmisi Mahmud Mərdavi AFP-yə bildirib ki, qrup hələ də İsrailin sənədinə cavab hazırlayır, lakin HƏMAS-ın “silahlarının heç bir danışıqlara məruz qalmayacağını” vurğulayıb.

İsrailin Müdafiə naziri Katz bildirib ki, İsrail yardımların 2,4 milyon insanın yaşadığı mühasirədə olan bölgəyə daxil olmasına mane olmağa davam edəcək.

İsrail martın 2-də yardım gəlməsini dayandırmaqla bölgədəki humanitar böhranı daha da dərinləşdirib.

“Bu yardımın qarşısının alınması HƏMAS-ın ondan xalqa qarşı alət kimi istifadəsinin qarşısını almaq üçün əsas təzyiqlərdən biridir”, - müdafiə naziri bildirib.

Sərhədsiz Həkimlər Təşkilatı İsrailin hücumları və yardım embarqosunun Qəzzanı qəbiristanlığa çevirdiyini bildirib.

Təşkilatın koordinatoru Amande Bazerolle "Qəzza fələstinlilər və onlara kömək etməyə çalışanlar üçün kütləvi məzarlığa çevrilib. Fələstinlilər və ya onlara kömək etməyə çalışanlar üçün təhlükəsiz sığınacaq olmadığından, humanitar yardım təhlükəsizliksizlik və kritik təchizatın olmaması səbəbindən ciddi şəkildə gərginləşib" deyib.

Birləşmiş Millətlər Təşkilatının Humanitar Məsələlərin Koordinasiyası İdarəsi, martın 18-dən etibarən Qəzzada "təxminən yarım milyon insanın yenidən didərgin düşdüyünü" təxmin etdiyini bildirib və daha əvvəl Qəzzanın müharibə başlayandan bəri ən ciddi humanitar böhranla üzləşdiyi barədə xəbərdarlıq edib.

Qətliam

İsrail 2023-cü ilin oktyabrından bəri mühasirədə olan Qəzzada əksəriyyəti qadın və uşaq olmaqla 51 mindən çox fələstinlini öldürüb.

İsrail martın 18-də birtərəfli qaydada atəşkəs rejiminə son qoyub, mühasirədə olan bölgənin çox hissəsini xarabalığa çevirən və demək olar ki, bütün əhalini köçkün vəziyyətinə salan soyqırım müharibəsini yenidən başladıb.

Rəsmi Təl-Əviv həmçinin bölgəni mühasirəyə alaraq təcili ehtiyac duyulan humanitar yardımın ölkəyə daxil olmasına mane olub.

Beynəlxalq Cinayət Məhkəməsi ötən ilin noyabrında İsrailin Baş naziri Benyamin Netanyahu və keçmiş Müdafiə naziri Yoav Qallantın Qəzzada hərbi cinayətlər və insanlığa qarşı cinayətlər törətdiyinə görə həbs olunmasına order verib.

İsrail həmçinin bölgəyə qarşı müharibəyə görə Beynəlxalq Ədalət Məhkəməsində soyqırım işi ilə üz-üzədir.