Türkiyənin enerji və təbii sərvətlər naziri Alparslan Bayraktar İslamabadda keçirilən danışıqlar zamanı bildirib ki, Türkiyə 2026-cı ildən etibarən Pakistanın üç dəniz və iki quru yatağında neft və təbii qaz kəşfiyyatına başlayacaq.
A.Bayraktar dekabrın 2-də Pakistanın Baş naziri Şahbaz Şərif, neft naziri Əli Pərvaiz Malik və energetika naziri Sərdar Əvais Əhməd Xan Leqarı ilə görüşüb. Danışıqlardan sonra Türkiyənin milli neft şirkəti TPAO altı Pakistan şirkəti – Mari Energies, Fatima, OGDCL, PPL, Prime və GHPL ilə karbohidrogen kəşfiyyatı və istehsalı üzrə müqavilələr imzalayıb.
İmza mərasimindən sonra çıxış edən Alparslan Bayraktar bu müqavilələri Ankara və İslamabad arasında enerji və mədənçilik sahəsində əməkdaşlığın genişləndirilməsində “əhəmiyyətli addım” adlandırıb. O, bildirib ki, Türkiyə son illərdə neft və təbii qaz kəşfiyyatı sahəsində güclü imkanlar inkişaf etdirib.
Alparslan Bayraktar vurğulayıb ki, Türkiyə ən azı bir dəniz blokunda operator kimi fəaliyyət göstərəcək və 2026-cı ildə Pakistan sahillərində seysmik tədqiqat gəmilərini yerləşdirəcək.
Pakistanı “əhəmiyyətli mineral sərvətlərə malik ölkə” kimi xarakterizə edən A.Bayraktar bildirib ki, Türkiyənin dövlətə məxsus mədən şirkətləri – MTAIC və Eti Maden tezliklə Pakistan bazarında fəaliyyətə başlayacaq. O, deyib: “Bu gün vacib qərarlar verdik. Afrika və Orta Asiyadakı işlərimizə bənzər şəkildə Pakistanda da birgə mədən layihələrinə sürətlə daxil olacağıq’’.
Alparslan Bayraktar həmçinin vurğulayıb ki, enerji və mədənçilik sahəsində əməkdaşlığın dərinləşdirilməsi Prezident Rəcəb Tayyib Ərdoğanın fevral ayında Pakistana səfəri zamanı müəyyən edilmiş ikitərəfli ticarət həcmini 5 milyard dollara çatdırmaq məqsədinə nail olmaq üçün vacibdir.
Nazir əlavə edib ki, həm Türkiyə, həm də Pakistan neft məhsulları və mayeləşdirilmiş təbii qazın əsas idxalçısıdır.
İslamabadda imzalanan müqavilələr Prezident Ərdoğanın fevral ayında bu ölkəyə etdiyi səfər zamanı karbohidrogen əməkdaşlığı, enerji keçidi və mədənçilik sahəsində imzalanan müqavilələrə əsaslanır. Bayraktar aprel ayında etdiyi səfər zamanı TPAO və Pakistan milli şirkətlərinin dənizdə və quruda tenderlər üçün birgə təkliflər təqdim etməsini təmin edib və bu təkliflər artıq kəşfiyyat lisenziyalarına çevrilib.
