Tayvanda məxfi məlumatları fotoşəkil çəkərək Çinə sızdırmaqda təqsirli bilinən dörd əsgər həbs edilib.
Taypey Rayon Məhkəməsinin yaydığı bəyanata görə, prezident aparatının təhlükəsizliyinə cavabdeh olan hərbi hissənin üç əsgəri və Müdafiə Nazirliyinin informasiya və telekommunikasiya komandanlığının bir əsgəri milli təhlükəsizlik qanununu pozmaqda təqsirli bilinib.
“Həmin şəxslərin əməlləri milli təhlükəsizliyi təhlükə altına alıb”, - deyə məhkəmə bildirib.
Tayvanda Pekinə casusluq ittihamı ilə mühakimə olunanların sayı son illərdə kəskin şəkildə artıb. Rəsmi məlumatlara görə, Çinin sızma cəhdlərinin əsas hədəfi hələ də Tayvan ordusunda xidmət edən və ya təqaüdə çıxmış əsgərlərdir.
Bu inkişaf dövlət başçısı Lai Çinq-tenin bu ay Çinin casusluq işlərinə və Tayvan əsgərləri ilə bağlı digər cinayətlərə baxılması üçün hərbi hakimləri vəzifələrinə qaytarılması ilə bağlı planını elan etdikdən sonra baş verib.
Məhkəmə dörd müttəhimin bir neçə ay ərzində gizli daxili hərbi məlumatları Çin kəşfiyyat agentlərinə ötürmək ittihamı ilə 5 il 10 aydan 7 ilə qədər həbs cəzasına məhkum edildiyini açıqlayıb.
Məhkəmə həmçinin qeyd edib ki, cinayətlər 2022-2024-cü illər arasında törədilib və müttəhimlər Çindən təqribən 7850-20000 dollar məbləğində ödənişlər alıblar. Lakin sızan məlumatın məzmunu ilə bağlı heç bir təfərrüat verilməyib.
Məhkəmənin bəyanatında deyilir ki, müttəhimlər son dərəcə həssas və vacib bölmələrdə çalışıblar, lakin onlar rüşvət almaqla və fotoşəkil çəkərək sirləri ötürməklə öz öhdəliklərini pozublar.
Prokurorlar bildiriblər ki, əsgərlərin mobil telefonları ilə hərbi məlumatların şəkilini çəkdikləri aşkar edilib.
Ötən ilin avqustunda Müdafiə Nazirliyinə verilən məlumatdan sonra araşdırma başlamazdan əvvəl üç əsgər ordudan qovulub, dördüncüsü isə xidmətdən uzaqlaşdırılıb.
Tayvanın kəşfiyyat agentliyi 2024-cü ildə 64, 2023-cü ildə 48, 2022-ci ildə isə 10 nəfərin Çinə casusluq ittihamı ilə mühakimə olunduğunu bildirib. Pekin muxtar statusa malik Tayvanı öz ərazisi hesab edir və lazım gələrsə adaya nəzarəti zorla ələ keçirəcəyini bəyan edib.
Tayvan boğazının hər iki tərəfində onilliklərdir ki, casusluq fəaliyyəti həyata keçirilir.
