İyunun 25-də Venesuelanın Yaracuy bölgəsində Türkiyə vaxtı ilə saat 01:04 və 01:05-də ardıcıl olaraq 7,2 və 7,5 bal gücündə iki güclü zəlzələ baş verib. Təbii fəlakətdən sonra Türkiyənin aidiyyəti qurumları səfərbər olunub. Türkiyə Fəlakət və Fövqəladə Halların İdarə Olunması Agentliyinin (AFAD) koordinasiyası ilə Xarici İşlər, Milli Müdafiə və Səhiyyə nazirlikləri, həmçinin Türkiyə Prezidentinin Təhlükəsizlik Xidməti arasında operativ əlaqə qurularaq humanitar yardım hazırlıqları tamamlanıb. Baş Qərargahla koordinasiyalı şəkildə həyata keçirilən işlər çərçivəsində İstanbul, İzmir və Dənizlidən olan 37 nəfərlik AFAD axtarış-xilasetmə heyəti, Səhiyyə Nazirliyinin 6 nəfərlik Milli Tibbi Xilasetmə Qrupu (UMKE) və Türkiyə Qızıl Aypara Cəmiyyətinin 2 humanitar yardım əməkdaşı zəlzələ bölgəsinə yola düşür. Ümumilikdə 45 nəfərdən ibarət bu heyətlə yanaşı tam təchiz olunmuş 3 axtarış-xilasetmə vasitəsi də ‘‘A-400M’’ tipli hərbi nəqliyyat təyyarəsi ilə Venesuelaya göndərilir. Türkiyə Xarici İşlər Nazirliyi və Türkiyənin Karakasdakı səfirliyi bölgədəki vəziyyəti yaxından izləyir.