Türkiyə Silahlı Qüvvələrinin Baş Qərargah rəisi ordu generalı Selçuk Bayraktaroğlu sentyabrın 15-də Azərbaycana səfər edərək, Azərbaycan Respublikasının müdafiə naziri general-polkovnik Zakir Həsənov və müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev ilə görüşüb.
Azərbaycan Müdafiə Nazirliyinin bəyanatına əsasən, Zakir Həsənov vurğulayıb ki, Türkiyə-Azərbaycan münasibətləri dərin tarixi köklərə, ortaq dəyərlərə və qarşılıqlı etimada əsaslanır.
O, iki ölkə liderləri arasındakı dostluq əlaqələrinin bu əməkdaşlığı daha da gücləndirdiyini qeyd edib.
Həsənov həmçinin Türkiyənin Azərbaycana davamlı dəstəyinə görə minnətdarlığını ifadə edib və 15 sentyabr tarixinin Bakı şəhərinin azad olunması ilə bağlı ölkəsi üçün tarixi əhəmiyyət daşıdığını vurğulayıb.
Öz növbəsində, Bayraktaroğlu belə səfərlərin etimad və dostluq üzərində qurulan münasibətlərin gücləndirilməsində mühüm rol oynadığını bildirib.
Onun Azərbaycan Baş Qərargah rəisi ilə müzakirələri Azərbaycan Silahlı Qüvvələrində aparılan son islahatlar və iki ölkə arasında hərbi əməkdaşlığın daha da inkişaf etdirilməsi yollarını əhatə edib.
Tərəflər həmçinin hərbi, texniki və təhsil sahəsində əməkdaşlıq, regional təhlükəsizlik və qarşılıqlı maraq doğuran digər məsələlər barədə fikir mübadiləsi aparıblar.
Azərbaycan Respublikasının Prezidenti İlham Əliyev də sentyabrın 15-də Şuşada Türkiyə Respublikası Silahlı Qüvvələrinin Baş Qərargah rəisi Selçuk Bayraktaroğlunu qəbul edib.
Qəbula görə minnətdarlığını bildirən Selçuk Bayraktaroğlu Prezident Rəcəb Tayyib Ərdoğanın salamlarını dövlət başçısına çatdırıb.
Prezident İlham Əliyev salamlara görə minnətdarlığını bildirib, onun da salamlarını Türkiyə Prezidentinə çatdırmağı xahiş edib.
Görüşdə ölkələrimiz arasında qardaşlıq və strateji müttəfiqlik münasibətlərinin bütün istiqamətlərdə, o cümlədən hərbi sahədə uğurla inkişaf etdiyi vurğulanıb.
Azərbaycan və Türkiyə qədər bir-birinə yaxın ölkələrin olmadığını deyən dövlət başçısı qeyd edib ki, birliyimiz dünya miqyasında önəmli amildir. Prezident İlham Əliyev bölgədə artıq sülh dövrünün başladığını vurğulayıb.
Söhbət zamanı iki qardaş ölkə arasında müttəfiqlik münasibətləri haqqında Bəyannamənin 2021-ci ildə məhz Şuşa şəhərində imzalanmasının önəminə də toxunulub.
Söhbət zamanı iki ölkənin hərbi qurumları arasında qardaşlığa, strateji müttəfiqliyə əsaslanan əməkdaşlığın daha da inkişaf etdirilməsi ilə bağlı fikir mübadiləsi aparılıb.
