BMT-nin baş katibi Antonio Quterreş ABŞ-ın İsraillə birlikdə İrandakı üç nüvə obyektinə hücumundan sonra hərbi əməliyyatların dərhal dayandırılmasına və İranın nüvə proqramı ilə bağlı danışıqların bərpasına çağırıb.
BMT Təhlükəsizlik Şurasının fövqəladə iclasında çıxış edən A.Quterreş deyib: “Hərbi əməliyyatları dayandırmaq və ciddi, davamlı danışıqlara qayıtmaq üçün dərhal və qətiyyətlə hərəkət etməliyik”.
O, Yaxın Şərq xalqlarının yeni bir münaqişəyə dözə bilməyəcəyini vurğulayaraq, İrana Nüvə Silahlarının Yayılmaması Müqaviləsinə (NPT) tam əməl etmək öhdəliyini xatırladıb.
BAEA rəhbəri: Dialoq pəncərəsi bağlanır
Beynəlxalq Atom Enerjisi Agentliyinin (BAEA) baş direktoru Rafael Qrossi hücumların nüvə təhlükəsizliyi və ümumi təhlükəsizlik baxımından vəziyyəti daha da gərginləşdirdiyini, lakin hazırda hər hansı radiasiya sızmasının qeydə alınmadığını bildirib.
Qrossi "Natanz" nüvə obyektinə ciddi ziyan dəydiyini, o cümlədən əsas enerji infrastrukturu və uran saxlanılan yeraltı bölmələrin zərər gördüyünü vurğulayıb. O, həmçinin kimyəvi çirklənmə riski ilə bağlı xəbərdarlıq edib və danışıqlara qayıtmaq imkanlarının sürətlə azaldığını diqqətə çatdırıb.
İranın BMT-dəki daimi nümayəndəsi ABŞ-ı qınadı
İranın BMT-dəki daimi nümayəndəsi Əmir Səid İrəvani ABŞ-ın həyata keçirdiyi hava hücumlarını Vaşinqtonun siyasi tarixində qara ləkə adlandırıb və İsrailin baş naziri Benyamin Netanyahunu ABŞ-ı daha bir əsassız müharibəyə sürükləməyə çalışmaqda ittiham edib.
"Beynəlxalq səviyyədə axtarışda olan hərbi cinayətkar Netanyahu bir daha ABŞ-ın xarici siyasətinə müdaxilə etməyi bacardı", – deyə İrəvani Təhlükəsizlik Şurasının iclasında bildirib.
Rusiya və Çin ABŞ ilə İsrailin hücumlarını pislədi
Rusiyanın BMT-dəki daimi nümayəndəsi Vasili Nebenzia ABŞ və İsrailin hava hücumlarını sərt şəkildə qınayaraq, bu addımı ABŞ-ın BMT-nin suveren üzvünə qarşı məsuliyyətsiz, təhlükəli və təxribat xarakterli hərəkəti kimi qiymətləndirib.
V.Nebenzia ABŞ-ın "Pandora qutusunu açdığını" qeyd edərək, bu vəziyyətin hansı yeni fəlakətlərə və ağrı-acılara yol aça biləcəyini heç kimin əvvəlcədən bilmədiyini vurğulayıb.
Çinin BMT-dəki nümayəndəsi Fu Konq da bənzər mövqe sərgiləyərək ABŞ-ın atdığı addımların BMT Nizamnaməsinin və beynəlxalq hüququn əsas prinsiplərini ciddi şəkildə pozduğunu bildirib.
Böyük Britaniya və ABŞ hücumları müdafiə etdi
Böyük Britaniyanın BMT-dəki daimi nümayəndəsi Barbara Vudvord ölkəsinin hücumda iştirak etmədiyini bəyan etsə də, İranın nüvə silahına malik olmamasının vacibliyini vurğulayıb. O, İranın nüvə proqramını beynəlxalq sülh və təhlükəsizliyə ciddi təhdid adlandırıb.
ABŞ-ın BMT-dəki müvəqqəti işlər vəkili Doroti Şi isə bəyan edib ki, həyata keçirilən hücumlar İranın nüvə zənginləşdirmə potensialını aradan qaldırmağa yönəlib.
