Volqoqrad vilayətinin qubernatoru Andrey Boçarov Ukraynaya məxsus pilotsuz uçuş aparatının (PUA) hücumu nəticəsində regionun cənubundakı yanacaq-energetika obyektində və Dzerjinski rayonundakı anbarlarda yanğın baş verdiyini bildirib. Mülki infrastruktura ziyan dəydiyini deyən qubernator beş nəfərin yaralandığını və fövqəladə hallar briqadalarının hadisə yerində yanğının söndürülməsi istiqamətində iş apardıqlarını vurğulayıb. Rusiyanın onlayn satış platforması "Wildberries" də hücum faktını təsdiqləyərək Volqoqraddakı logistika mərkəzlərindən birində yanğın baş verdiyini açıqlayıb.
Rostov vilayətinin qubernatoru Yuri Slyusar da Qukovo şəhərində PUA-nın yaşayış binasına çırpılması nəticəsində bir nəfərin yaralandığını qeyd edib.
Rusiya Müdafiə Nazirliyi ölkə ərazisində, ilhaq olunmuş Krımda, eləcə də Qara və Azov dənizləri akvatoriyasında Ukraynaya məxsus ümumilikdə 371 dronun zərərsizləşdirildiyini iddia edib.
Ukrayna tərəfi isə Rusiya qüvvələrinin Nikopol rayonuna etdiyi hücum nəticəsində iki mülki şəxsin həlak olduğunu, üç nəfərin isə yaralandığını bildirib. Ukrayna Hərbi Hava Qüvvələri ölkənin şimal, cənub və şərq istiqamətlərində Rusiya PUA-larının vurulduğunu açıqlayıb.
