Türkiyə Xarici işlər naziri Hakan Fidan Avropa Komissiyasının sədri Ursula fon der Lyayenin Türkiyə ilə bağlı son açıqlamalarını “təəssüfləndirici” adlandıraraq məsələnin diplomatik kanallar vasitəsilə müzakirə olunduğunu bildirib.

Aprelin 24-də Oksford Universitetində çıxış edən H.Fidan deyib: “Sədrin açıqlamaları uğursuz idi, lazımi təmasları qurduq, beləliklə də məsələnin həll edildiyini düşünürük”.

H.Fidanın bu fikirləri U.fon der Lyayenin bu həftə Hamburqda “Die Zeit” qəzetinin 80 illiyi münasibətilə keçirilən tədbirdə səsləndirdiyi çıxışı ilə bağlı olub.

Xatırladaq ki, həmən tədbirdə Aİ-nin genişlənməsi məsələsinə toxunan U.fon der Lyayen deyib: “Avropa qitəsini tamamlamalıyıq ki, Rusiya, Türkiyə və ya Çinin təsiri altında qalmasın.”

“Məsələnin siyasi istismarı”

Türkiyə dövləti aprelin 24-də bəzi ölkə rəsmilərinin 1915-ci il hadisələri ilə bağlı açıqlamalarına cavab olaraq bəyanat yayımlayıb. Regional sabitliyi vurğulayaraq məsələnin siyasi istismarına qarşı çıxıb.

Tükiyə Xarici İşlər Nazirliyinin rəsmi internet saytında yayımlanan açıqlamada qeyd olunub: “Cənubi Qafqazda formalaşan sülh mühiti regionun sabitlik və əməkdaşlıq məkanına çevrilməsini istəyənlərin tarixdən düşmənçilik yaratmağa çalışanlara verdiyi güclü cavabdır. Bəzi üçüncü ölkə siyasətçilərinin bu mövzudan dar siyasi maraqları üçün istifadə etməyə və ya öz məsuliyyətlərini ört-basdır etməyə çalışdıqları müşahidə olunur.”

Türkiyə dövləti uzun müddətdir mövcud olan mövqeyini təkrarlayaraq tarixi araşdırma və şəffaflığa sadiq qaldığını bildirib. Rəsmi Ankara bu torpaqlarda əsrlər boyu birgəyaşayış mədəniyyətinin ən güclü nümunələrinə ev sahibliyi etdiyini vurğulayaraq 1915-ci il hadisələrinin obyektiv və ədalətli araşdırılması üçün birgə tarix komissiyasının yaradılması təklifini xatırladıb.

Açıqlamada qeyd olunub: “Konstruktiv niyyət daşıyan üçüncü tərəfləri son dövrdə formalaşan müsbət dialoq mühitini dəstəkləməyə çağırırıq.”