ABŞ Prezidenti Donald Tramp iki ölkə arasında davam edən müharibəyə son qoymaq məqsədilə İranla tarixi bir razılaşmanın əsasən danışıqlar yolu ilə əldə edildiyini və hazırda sənədin yekunlaşdırılma mərhələsində olduğunu açıqlayıb.

Rəsmi internet səhifəsində paylaşım edən Donald Tramp razılaşmanın son təfərrüatlarının hələ də müzakirə olunduğunu və tezliklə rəsmən elan ediləcəyini bildirib. Donald Trampın sözlərinə görə, bu tarixi razılaşma çərçivəsində strateji əhəmiyyət kəsb edən Hörmüz boğazı da yenidən gəmilərin hərəkəti üçün açılacaq.

ABŞ və İran arasındakı bu diplomatik irəliləyiş Pakistanın vasitəçiliyi ilə baş tutub. İslamabadın rəhbərlik etdiyi danışıqlarda əsas diqqət Hörmüz boğazının açılması şərtlərinə, Tehranın nüvə proqramı ətrafındakı narahatlıqların həllinə və qarşılıqlı sanksiyaların yumşaldılmasına yönəlib.

ABŞ Prezidenti bu potensial razılaşmanı regional liderlərlə müzakirə etdiyini bildirib.