Bir çox pakistanlı Tramp administrasiyasının yeni səyahət qadağası siyahısını elan etməsini həyəcanla gözləyir. Bu siyahıya Pakistanın daxil olub-olmayacağı hələ dəqiq bilinmir.

Hələlik rəsmi bir açıqlama yoxdur, lakin 5 mart tarixli “Reuters” xəbərinə görə, üç anonim mənbə Əfqanıstanla yanaşı Pakistanın da bu siyahıya daxil edilməsinin tövsiyə ediləcəyini bildirib. Siyahıya digər müsəlman əksəriyyətli ölkələrin də daxil ola biləcəyi qeyd edilib, lakin onların adları açıqlanmayıb.

Bu xəbər Pakistan üçün, xüsusilə də hökumət, hakim elita və varlı vətəndaşlar üçün gözlənilməz bir şok oldu. Axı Pakistanın ABŞ-la sıx əməkdaşlıq tarixi var və ingilisdilli elitası həmişə Qərbə meyilli olub.

ABŞ-a təhsil, iş, biznes qurmaq, əmlak almaq və nəticədə orada məskunlaşmaq bir çox təhsilli və peşəkar pakistanlıların arzusu olub. ABŞ heç vaxt Pakistan üçün qapılarını tam bağlamayıb. Münasibətlərdəki eniş-yoxuşlara baxmayaraq, hər iki ölkənin təhlükəsizlik qurumları adətən yaxın əlaqələr saxlayıb.

Səyahət qadağası xəbəri Pakistan üçün daha da təəccüblü idi, çünki cəmi bir gün əvvəl, 4 martda, Prezident Donald Tramp Konqresin birgə iclasında çıxışı zamanı Pakistana terrorçu Məhəmməd Şərifullahın həbsindəki köməyinə görə təşəkkür etmişdi.

CIA-nın verdiyi məlumat əsasında Pakistan hakimiyyəti Məhəmməd Şərifullah adlı şəxsi Əfqanıstan sərhədinə yaxın Bəlucistan əyalətində həbs edib və onu amerikalılara təhvil verib. Şərifullah 26 avqust 2021-ci ildə Kabil hava limanında 13 ABŞ əsgəri və 170 əfqanı öldürən terror hücumunun təşkilində də ittiham olunur.

Şahbaz Şərif hökuməti hələ də “Trampın təşəkkürü”nün sevincini yaşayarkən və xəbər kanalları bu xəbəri yayımlayarkən, Pakistanın səyahət qadağası siyahısına daxil olma ehtimalı ortaya çıxdı.

Lakin iki keçmiş pakistanlı diplomatın fikrincə, Trampın təşəkkürünə həddindən artıq reaksiya verməyə ehtiyac yoxdur. “Reuters” agentliyinin xəbərinə də ehtiyatla yanaşmaq lazımdır.

“Bu (səyahət qadağası) barədə Reuters xəbərindən başqa etibarlı məlumatım yoxdur,” deyə ABŞ-dakı keçmiş Pakistan səfiri Şerri Rəhman bildirib. “Bu baş versə, təəccüblü olar... Məncə, Pakistan üçün ümumi bir qadağa tətbiq edilməyəcək”, -deyə o qeyd edib.

Digər keçmiş diplomat Məsud Xan isə “Reuters” agentiliyinin xəbərini oxuduqdan sonra bunun baş verməməsi üçün dua etdiyini bildirərək deyib: “Bu, çox mənfi bir qərar olar və mənfi nəticələr doğurar.”

Pakistan üçün ABŞ-la münasibətlər çox önəmlidir. ABŞ yalnız ölkənin ən böyük ixrac bazarı deyil, həm də Beynəlxalq Valyuta Fondu (IMF) və Dünya Bankı kimi çoxtərəfli maliyyə qurumları ilə əlaqələrdə İslamabad üçün vacib dəstəkdir. Pakistanın hazırkı BVF proqramı Vaşinqtonun dəstəyi olmadan mümkün olmazdı.