Tibbi mənbələrin verdiyi məlumata görə, Qəzzada yeddi aylıq Şata Əbu Cərad adlı körpə kəskin soyuqdan ölüb. Bununla da, bu il soyuqdan ölən uşaqların sayı doqquza yüksəlib.

İsrailin iki ildən artıq davam edən hərbi müdaxiləsi nəticəsində infrastruktur dağılıb və 1,5 milyondan çox fələstinli məcburi köçkün vəziyyətinə düşüb. Hazırda yüz minlərlə ailə çadırlarda və ya sığınacaqlarda yaşayır. Kifayət qədər yorğan, isti geyim və qızdırıcının olmaması dinc sakinlərin həyatını ciddi təhlükəyə atır.

Oktyabrın 10-da atəşkəs razılaşması əldə edilsə də, yardım təşkilatları İsrailin Qəzzaya humanitar yardım və sığınacaq materiallarının girişini blokladığını bildirir. Qəzzadakı hökumətin media ofisindən verilən məlumata görə, son fırtınalar nəticəsində təxminən 7000 çadır tamamilə dağılıb.

Rəsmi məlumatlara görə, soyuqdan ölənlərin ümumi sayı artıq 30-a yaxınlaşır. Qurbanların hamısı yurd-yuvalarından didərgin düşmüş şəxslərdir.

Qeyd edək ki, 2023-cü ilin oktyabr ayından bəri Qəzzada əksəriyyəti qadın və uşaqlar olmaqla 70.700-ə yaxın insan həyatını itirib, 171.000-dən çox adam isə yaralanıb.