Polşa xarici kəşfiyyat üçün hərbi personal və vacib infrastruktur haqqında məlumat toplamaqda ittiham olunan iki ukraynalını saxlayıb.

Xüsusi Xidmətlər naziri Tomaş Simonyak ötən həftə Polşa və Rumıniya tərəfindən saxlanılan səkkiz nəfər arasında iki ukraynalının olduğunu açıqlayıb.

Simonyak Polşa radiosuna müsahibəsində deyib:"Bu, təxribat fəaliyyətlərinin və təxribata hazırlıqların intensivləşdiyinin sübutudur’’.

Polşa Daxili Təhlükəsizlik Agentliyi (ABW) oktyabrın 14-də ölkənin cənubundakı Katovitse şəhərində 32 və 34 yaşlı iki ukraynalının saxlanıldığını açıqlayıb. Agentliyin məlumatına görə, şübhəlilər Polşa Silahlı Qüvvələrinin üzvləri və Ukraynanı dəstəkləyən infrastruktur haqqında məlumat toplamaqda ittiham olunur.

Məhkəmə iki şübhəlinin məhkəmə prosesinə qədər üç ay müddətinə həbsdə saxlanmasına qərar verib.