Ukrayna Prezidenti Volodimir Zelenski rəsmi Kiyevin PUA və raket istehsalını artırdığını və Rusiyanın hücumlarına "simmetrik" cavab verəcəyini bildirib.

Volodimir Zelenski çərşənbə axşamı yüksək səviyyəli hərbi rəsmilərlə keçirdiyi geniş tərkibli görüşdən sonra bildirib ki, Ukrayna, Rusiyanın hücumlarına cavab verməyə hazır olmaq və qabaqlayıcı tədbirlər görmək məqsədilə hərəkətlərini planlaşdırır. O, Ukraynanın PUA və uzaqmənzilli raket sistemlərinin istehsalını artıracağını vurğulayıb.

Prezident həmçinin qeyd edib ki, Ukraynanın müdafiəsini gücləndirmək üçün Avropa ölkələri ilə yeni müqavilələr hazırlanır.

"Bizim gözləntimiz Rusiyanın bütün təhdidlərinə simmetrik cavab verməkdir", – deyən Volodimir Zelenski rusların Ukraynaya etdiklərinin nəticələrini hiss etməli olduqlarını və bunu hiss edəcəklərini bildirib.

Rusiya Müdafiə Nazirliyi yaydığı bəyanatda bildirib ki, Rusiya hava hücumundan müdafiə sistemləri üç saat ərzində 112 Ukrayna PUA-sını məhv edib və ya onların qarşısını alıb.

Moskva meri Sergey Sobyanin isə qeyd edib ki, Ukraynaya məxsus altı pilotsuz uçuş aparatı Rusiyanın paytaxtına doğru hərəkət edərkən məhv edilib. Onun sözlərinə görə, xilasetmə qrupları yerdəki qalıqları araşdırır.

Rusiya həmçinin son günlərdə Ukraynaya qarşı həyata keçirilən ağır hava hücumlarının Ukraynanın mülki əhaliyə qarşı artan pilotsuz təyyarə hücumlarına cavab olduğunu açıqlayıb.

Rəsmi Kiyev və onun Qərbdəki müttəfiqlərinin qeyd-şərtsiz 30 günlük atəşkəs təkliflərini rədd edən Moskva cümə günündən bazar ertəsinə qədər Ukraynaya PUA hücumları təşkil edib.