Birləşmiş Millətlər Təşkilatının Ümumdünya Ərzaq Proqramı (ÜƏP) bildirib ki, Yaxın Şərqdəki münaqişələr qlobal təchizat zəncirində ciddi pozuntulara səbəb olub və bu da 70 min ton ərzaq tədarükünə mənfi təsir göstərib.

ÜƏP-in Təchizat Zənciri üzrə direktoru Korin Fleyşer Cenevrədə jurnalistlərə verdiyi bəyanatda xüsusilə Hörmüz boğazındakı gərginlik səbəbindən limanlarda daşınmaların gecikdiyini vurğulayıb.

Böhranın bütün mərhələlərə təsir etdiyini bildirən Fleyşer gəmilərin limanlarda ilişib qalması və konteynerlərin boşaldıla bilməməsi kimi proseslərin zəncirvari reaksiya yaratdığını qeyd edib. O, marşrutların Afrika ətrafına yönləndirilməsinin daşınma müddətini 25-30 gün artırdığını, yükdaşıma xərclərinin isə 15-25% bahalaşdığını diqqətə çatdırıb.

Artan humanitar ehtiyaclarla bağlı xəbərdarlıq edən direktor bildirib ki, iyun ayına qədər daha 45 milyon insan kəskin aclıqla üzləşə bilər. Fleyşer maliyyə çatışmazlığı fonunda artan xərclərin yardımların ehtiyac sahiblərinə çatdırılmasını çətinləşdirdiyini bildirərək, dünya üzrə ərzaq qiymətlərinin bahalaşmasının ciddi narahatlıq doğurduğunu qeyd edib.