Htet Min Oo cümə günü Myanmanın mərkəzində baş verən zəlzələ zamanı Mandalaydakı evinin yaxınlığında yerləşən məsciddə dəstəmaz alırdı. Zəlzələ nəticəsində həm evi, həm də məscidin bir hissəsi dağılıb, o və iki xalası dağıntılar altında qalıb. Sakinlər onları xilas etməyə çalışsalar da, yalnız birini çıxara biliblər.
25 yaşlı Htet Min Oo iki əmisi və nənəsinin də dağıntılar altında qaldığını bildirib. "Onların sağ olub-olmadığını bilmirəm. Artıq ümidim qalmayıb. Çox böyük dağıntılar var və hələ heç bir xilasedici gəlməyib", - deyə o, bildirib.
Müqəddəs Ramazan ayında cümə namazı üçün məscidlərə axışan yüzlərlə müsəlmanın zəlzələdə həyatını itirdiyi barədə narahatlıqlar mövcuddur. Milli Birlik Hökumətinin məlumatına görə, 50-dən çox məscidə ziyan dəyib.
Həyatda qalanlar
Mandalayda yaşayan 39 yaşlı sakin Sule Kone kəndində dağılmış məscidin dağıntıları altında qalan bir şəxsi xilas etməyə çalışarkən baş verən yeni təkanlar səbəbindən qaçmağa məcbur olduğunu bildirib. "Onu orada qoymalı oldum... İkinci dəfə girdim və onu xilas etməyə çalışdım. Dörd nəfəri öz əllərimlə dağıntılar altından çıxardım. Amma təəssüf ki, onlardan üçü artıq ölmüşdü, biri isə qucağımda öldü", - deyə adının açıqlanmasını istəməyən sakin bildirib.
O, 3 məscidin dağılması nəticəsində sözügedən kənddə 23 nəfərin, yaşadığı məhəllədə isə 10 nəfərin həyatını itirdiyini qeyd edib. O, həmçinin dövlətin tətbiq etdiyi məhdudiyyətlər səbəbindən məscidlərin gücləndirilməsinə icazə verilmədiyini qeyd edib.
Myanmada yaşayan müsəlmanlar uzun müddətdir ki, ultramillətçi və radikal qruplar tərəfindən zorakılığa məruz qalırlar. Myanma hakimiyyəti onilliklər ərzində müsəlmanların yeni məscidlər tikməsini və ya mövcud məscidlərin təmirini çətinləşdirib. ABŞ Dövlət Departamentinin 2017-ci il hesabatına görə, tarixi məscidlər uzun illər təmir icazəsi almadığından yararsız vəziyyətə düşüb.
Zəlzələ buddist məbədlərinə də ziyan vurub. Hərbi idarənin məlumatına görə, zəlzələ nəticəsində 670 monastır və 290 paqoda da zərər görüb. Lakin rəsmi hesabatlarda məscidlərin adı çəkilməyib.
Julian Kile adlı sakin internet səhifəsi vasitəsilə ağır beton blokları qaldırmaq üçün tikinti texnikası tələb edib. "Mənim ailə üzvlərim və digərləri dağıntılar altında əzilərək həlak oldular. Onların meyitlərini çıxarmaq üçün ümidsiz şəkildə kömək gözləyirik", - deyə Julian Kile bildirib.
Taunqnu şəhərinin sakini isə Kandav məscidinin bir tərəfinin dağıldığını və dağıntıların məscidin qarşısında oturan iki günahsız kişinin üzərinə aşdığını qeyd edib.
