Dəyəri 450 milyon dollardan çox olan dəmir yolu layihəsi Cənubi Asiya boyu infrastrukturu modernləşdirmək və regional iqtisadi əlaqələri gücləndirmək məqsədi daşıyır.

Hindistan və Butan sentyabrın 29-da iki ölkəni birləşdirən ilk transsərhəd dəmir yolu xəttini inşa edəcəklərini açıqladılar.

454 milyon dollarlıq layihənin dörd il ərzində başa çatdırılması nəzərdə tutulur.

Hindistanın Xarici İşlər Nazirliyi katibi Vikram Misri Butanın əsas ticarət tərəfdaşı olan Hindistanın Himalayda olan bu krallıq ölkəsinin infrastrukturunun və iqtisadiyyatının modernləşdirilməsində "həyati rol oynadığını" söyləyib.

Hindistanın dəmir yolları üzrə naziri Aşvini Vaişnav dəmir yolu layihəsinin "Butan xalqına böyük fayda gətirəcəyini" qeyd edib.

O, "Bütün bölgə birləşdiriləcək. Hazırda günlər çəkən yüklərin daşınması artıq bir neçə saat ərzində həyata keçiriləcək" deyib.

İlk mərhələdə 34,56 milyard rupi (390 milyon dollar) dəyərində tikiləcək 69 kilometrlik (43 mil) dəmir yolu xətti Hindistanın şimal-şərqindəki Kokrajhar şəhərini 10 min əhalisi olan Butanın Gelephu qəsəbəsi ilə birləşdirəcək.

“Cənubi Asiyanın mərkəzi”

5,77 milyard rupi (65 milyon dollar) dəyərində tikiləcək ikinci 20 kilometrlik dəmir yolu xətti Butanın şimal-qərbindəki sənaye mərkəzi olan Samtse ilə Hindistanın şərqindəki Banarhat şəhərini birləşdirəcək.

Kiçik və dənizə çıxışı olmayan, əhalisi 800.000-dən az olan Butan Çin və Hindistan arasında sıxışmış mövqedə yerləşib. Ölkə ümumi milli xoşbəxtliyi inkişafdan üstün tutmaqla tanınır.

Buna baxmayaraq, Butan xarici investisiyaları və turistləri cəlb etmək üçün Gelephu iqtisadi zona kimi inkişaf etdirməyi hədəfləyir. Yeni dəmir yolu bu inkişafda əsas rol oynayacaq.

Misri "Bu bölgə Butanı Cənubi Asiya və Cənub-Şərqi Asiya ilə birləşdirən iqtisadi mərkəz kimi dizayn edilir" deyib.

Vaişnav bildirib ki, yeni dəmir yolu xətləri elektrik enerjisi ilə daşımalara malik olacaq və mümkün qədər ətraf mühitə uyğun dizayn ediləcək.