Tibb işçilərinin verdiyi məlumata görə, Yəməndən buraxılan pilotsuz uçuş aparatının İsrailin cənubundakı Eylat şəhərinə düşməsi nəticəsində ən azı 50 nəfər yaralanıb.

İsrailin milli təcili yardım xidməti yaralananlar arasında üç nəfərin vəziyyətinin ağır olduğunu qeyd edib.

İsrailin gündəlik qəzetlərindən biri olan “Yedioth Ahronoth” pilotsuz uçuş aparatının Qırmızı dəniz sahilində yerləşən Eylat şəhərindəki Mall Hayam ticarət mərkəzinin yaxınlığında, turizm baxımından sıx bir ərazidə düşdüyünü bildirib.

İsrail ordusu təsdiqləyib ki, pilotsuz uçuş aparatı Yəməndən buraxılıb və müdaxilə cəhdlərinə baxmayaraq Eylata düşüb.

Husilərin hərbi sözçüsü Yəhya Səri bildirib ki, qrup "iki pilotsuz uçuş aparatı ilə keyfiyyətli hərbi əməliyyat" həyata keçirib və Eylatda iki İsrail obyektini hədəf alaraq "məqsədlərinə uğurla çatıb".

Bu hücum İsrail ilə husilər arasında son aylarda artan gərginlik fonunda baş verib. İsrailin Qəzzadakı soyqırımı ilə əlaqədar olaraq tərəflər arasında qarşılıqlı hücumlar davam edir.

Keçən həftə İsrail hərbi təyyarələri Yəmənin sahil şəhəri Hudeydədəki Husi mövqelərinə hava hücumları həyata keçirib.

Ötən ay İsrailin Yəmənin paytaxtı Sənada həyata keçirdiyi hücum nəticəsində Baş nazir Əhməd əl-Rahavi və doqquz digər nazir daxil olmaqla 12 yüksək səviyyəli Husi rəsmisi həlak olub.

İsrail ilə husilər arasındakı qarşıdurma Qəzzadakı soyqırımın ikinci ilinə yaxınlaşdığı bir vaxtda daha da şiddətlənib. Yəmənin böyük hissəsinə nəzarət edən husilər fələstinlilərə həmrəyliklərini bəyan edərək İsrailə qarşı hücumlarını artırıblar.