İstanbul Respublika Baş prokurorluğu ötən il Qəzzaya humanitar yardım daşıyan “Qlobal Sumud” donanmasına qarşı silahlı hücumla bağlı İsrailin Baş naziri Benyamin Netanyahunun da daxil olduğu 35 şübhəli barəsində ittiham aktı hazırlayıb.
İttiham aktında hər bir şübhəli üçün ağırlaşdırılmış ömürlük həbs və 4 min 596 ilədək azadlıqdan məhrumetmə cəzası tələb olunur. İttihamlar arasında “bəşəriyyətə qarşı cinayət”, “soyqırım” və “işgəncə” maddələri yer alıb.
Xatırladaq ki, “Qlobal Sumud” donanmasındakı fəallar 2025-ci ilin sentyabr ayında Qəzzaya humanitar yardım çatdırmağa çalışarkən İsrailin hərbi-dəniz qüvvələri tərəfindən beynəlxalq sularda hücuma məruz qalıb.
Qeyd edilir ki, Türkiyə dövləti bu istintaqa Birləşmiş Millətlər Təşkilatının Dəniz Hüququ Konvensiyası və Türkiyənin cinayət qanunvericiliyində nəzərdə tutulan yurisdiksiya müddəaları çərçivəsində başlayıb.
Sistematik pozuntular
Məsələylə bağlı Türkiyə prezident administrasiyasının ictimaiyyətlə əlaqələr idarəsinin rəhbəri Burhanəddin Duran B.Netanyahunu tənqid atəşinə tutaraq deyib: “Onun heç kimə dərs verməyə nə haqqı, nə də legitimliyi var.”
B.Duran B.Netanyahunu regionu qeyri-sabit vəziyyətə salmaqda günahlandıraraq onun “insanlığa qarşı törətdiyi cinayətlərə görə” cavab verəcəyini deyib.
Türkiyə rəsmiləri Qəzza və Livanda davam edən pozuntularla bağlı mövqelərini bir daha təkrarlayaraq, məsuliyyət və beynəlxalq hüquqa riayət olunması çağırışı ediblər.
Tənqidçilər və region liderləri B.Netanyahunu münaqişəni uzatmaq məqsədilə atəşkəs rejimini sistemli şəkildə pozmaqda günahlandırıblar.
Xatırladaq ki, 2025-ci ilin oktyabr ayında Qəzzada elan olunan atəşkəsə baxmayaraq, mənbələr İsrailin 2 mindən çox pozuntu törətdiyini və bunun nəticəsində 738 nəfərin həyatını itirdiyini bildirir.
Livanda isə ABŞ ilə İran arasında iki həftəlik atəşkəs tətbiq olunsa da, İsrail razılaşmanın “Hizbullah”a qarşı hücumları əhatə etmədiyini əsas gətirərək “Əbədi qaranlıq” adlı hərbi əməliyyatlarını davam etdirir.
Birləşmiş Millətlər Təşkilatının münaqişənin “ən dağıdıcı” mərhələsi kimi qiymətləndirdiyi aprelin 8-də həyata keçirilən koordinasiyalı hücumlar nəticəsində təkcə həmin gün ölənlərin sayı 357-yə çatıb.
Bundan əlavə, Beynəlxalq Cinayət Məhkəməsi 2024-cü ildə Qəzzada törədilən müharibə cinayətləri ilə bağlı Benyamin Netanyahu barəsində həbs qərarı çıxarıb. Qəzzada 2023-cü ilin oktyabr ayından etibarən 72 mindən çox fələstinlinin öldürüldüyü bildirilir.
BMT-nin Qaçqınlar üzrə Ali Komissarlığı isə 10 dəqiqə ərzində 100 nöqtənin vurulmasından sonra Livanın indiyədək ən “dağıdıcı” böhranla üzləşdiyi barədə bəyanat yayıb.
