Rəsmi Moskva Əfqanıstandakı Taliban hakimiyyətinə DAEŞ-in (İŞİD) Əfqanıstan qoluna qarşı mübarizədə kömək edəcək. Bu barədə Rusiyanın Əfqanıstan üzrə xüsusi nümayəndəsi Zamir Kabulov mayın 2-də RİA dövlət xəbər agentliyinə bildirib. DAEŞ-i Rusiya və Əfqanıstanın “ümumi düşməni” adlandıraraq deyib: “Biz Talibanın DAEŞ-in Əfqanıstan qoluna qarşı mübarizədə göstərdiyi səyləri görür və qiymətləndiririk. Xüsusi strukturlar vasitəsilə Əfqanıstan hakimiyyətinə necə lazımsa, köməyimizi göstərəcəyik.”
Hazırda heç bir ölkə Taliban hökumətini tanımır. Taliban 2021-ci ilin avqustunda ABŞ-ın rəhbərlik etdiyi qüvvələrin 20 illik müharibədən sonra Əfqanıstandan xaotik şəkildə geri çəkilməsindən sonra hakimiyyətə qayıdıb.
Z.Kabulovun açıqlamaları son illər rəsmi Moskva ilə Kabil arasında yaranmış dramatik yaxınlaşmanı göstərir. Rusiya prezidenti Vladimir Putin 2024-cü ildə bildirdi ki, “Əfqanıstan indi terrorizmlə mübarizədə Rusiyanın müttəfiqidir”.
2024-cü ildə Rusiya Talibanı 2003-cü ildən bəri daxil etdiyi “Terror təşkilatları siyahısı”ndan rəsmi olaraq çıxarıb.
2024-cü ilin martında Moskva yaxınlığındakı bir konsert zalında 145 nəfərin öldürüldüyü hücumun məsuliyyətini DAEŞ öz üzərinə götürdü, amma arxasında ABŞ rəsmilərinin olduğunu göstərən kəşfiyyat məlumatları ortaya çıxdı.
Hal-hazırda Taliban administrasiyası Əfqanıstanda qrupun mövcudluğunu tamamilə aradan qaldırmaq üçün çalışdığını bildirib. Kabulov qeyd edib ki, rəsmi Moskva və Kabil bir çox sahədə əlaqələri gücləndirir və Rusiya da Əfqanıstan səfirini akkreditasiya etməlidir. O, Rusiyanın Taliban üzərindəki qadağasını dayandırması “Ölkələrimiz arasında müxtəlif sahələrdə tam əməkdaşlıq üçün bütün maneələri aradan qaldırmaq” adlandırıb və “Əfqanlstan səfirinin Moskvaya gəlişi bu məsələyə son nöqtəni qoyacaq” deyib.
Xatırladaq ki, 2025-ci ilin aprel ayında Rusiya Əfqanıstanın strateji mövqeyindən istifadə edərək enerji və infrastruktur layihələri üçün gələcək perspektivlər yaratmaq məqsədilə rəsmi Kabil ilə ticarət, biznes və investisiya əlaqələrini gücləndirmək niyyətində olduğunu bildirdi. Birgə iqtisadi layihələr may ayının sonunda Rusiyanın Kazan şəhərində keçiriləcək Rusiya-Əfqanıstan Biznes Forumunda müzakirə olunacaq. Burada mineral resursların işlənməsi və qaz kəməri layihələrini mümkün əməkdaşlıq sahələri müzakirə ediləcək.
