İsrail media orqanlarının yaydığı məlumata görə, Baş nazir Benyamin Netanyahu Misirin hərbi imkanlarının artdığını və yaxından izlənilməli olduğunu, həmçinin ABŞ prezidenti Donald Trampın İranla bağlı son qərarının nə olacağını bilmədiyini bildirib.
"Israel Hayom" qəzetinin məlumatına görə, Netanyahu bu açıqlamaları fevralın 5-də Knessetin Xarici İşlər və Müdafiə Komitəsinin qapalı iclasında Misirin genişlənən hərbi gücü ilə bağlı narahatlıqlarını ifadə edərkən verib. Qəzet qeyd edir ki, bu sözlər İsrail və Misir arasındakı münasibətlərin həssaslığı ilə bağlı müzakirələr zamanı səslənib.
İsrail və Misir dekabr ayında təxminən 35 milyard dollar dəyərində təbii qaz müqaviləsi imzalayıblar. Netanyahu hökumətinin müqaviləni təsdiqlədiyini açıqlayaraq, onu İsrail tarixində ən böyük müqaviləsi kimi xarakterizə edib.
“Channel 12” telekanalının məlumatına görə, Netanyahu eyni iclasda İran və İsrailin ABŞ ilə koordinasiyası məsələsinə də toxunub.
Məlumatda qeyd olunur ki, Netanyahu Vaşinqtonla koordinasiyanın “mümkün olan ən yüksək səviyyədə” olduğunu bildirib, lakin Trampın İranla bağlı son mövqeyinin qeyri-müəyyən olduğunu da etiraf edib.
Qanunvericilərə müraciət edən B.Netanyahu İranın idarəetmə sistemində kritik bir mərhələnin yarandığını, lakin belə bir prosesin Tehran administrasiyasının devrilməsi ilə nəticələnəcəyini əvvəlcədən bilmədiyini söyləyib.
Netanyahu həmçinin İsrailin hücuma məruz qalacağı təqdirdə İrana qarşı “daha sərt” cavab verəcəyini və hər hansı bir əməliyyatın iyun ayında həyata keçirilən hücumların miqyasını keçirəcəyini vurğulayıb.
Xatırladaq ki, 2025-ci il iyunun 12-də tərəflər arasında münaqişə baş verib. Münaqişəyə səbəb İsrailin İranın hərbi və nüvə obyektlərini, eləcə də bəzi mülki əraziləri hədəf alan misli görünməmiş hücumu olub.
ABŞ da əməliyyatlarda iştirak edərək İranın üç nüvə obyektinə hücum edib. Daha sonra ABŞ Prezidenti Donald Tramp tərəfindən başlanan atəşkəs qüvvəyə minib.
Qeyd edək ki, 2024-cü ilin aprelində Qəzzada İsrailin hərbi əməliyyatları zamanı İran Dəməşqdəki konsulluğuna edilən hücuma cavab olaraq misli görünməmiş PUA və raket hücumları həyata keçirib.
