Nigeriya təhlükəsizlik qüvvələrinin ölkənin şimal-şərqindəki Borno əyalətində keçirdiyi əməliyyatlar nəticəsində DEAŞ-la əlaqəli ISWAP terror qruplaşmasının ən azı 25 üzvü zərərsizləşdirilib.

Nigeriyanın "Channels" telekanalının məlumatına görə, əməliyyatlar Limankara və Kukava bölgələrində həyata keçirilib. İlkin qarşıdurmada 15 terrorçu məhv edilib, bir çox qruplaşma üzvü isə yaralı vəziyyətdə ərazidən qaçıb. Hava müşahidə qruplarının qaçan terrorçuları izləməsi nəticəsində daha 10 terrorçu zərərsizləşdirilib. Əməliyyat zamanı terrorçulara məxsus logistik mərkəzlər və müdafiə strukturları sıradan çıxarılıb, iki nəqliyyat vasitəsi ilə çox sayda silah-sursat ələ keçirilib.

Nigeriya uzun müddətdir ki, "Boko Haram" və ISWAP kimi terror təşkilatlarının hücumları ilə mübarizə aparır. ABŞ prezidenti Donald Tramp ölkədəki xristianların "təqib olunduğunu" iddia etsə də, Abuja hökuməti və müstəqil ekspertlər bu iddiaları rədd edir. Terror zorakılığının dini ayrı-seçkilik etmədən həm xristianlara, həm də müsəlmanlara eyni dərəcədə təsir göstərdiyi bildirilir.

Dekabrın 25-də ABŞ ordusu Nigeriyanın Sokoto əyalətində DEAŞ-la əlaqəli hədəflərə qarşı hava hücumları təşkil edib. Nigeriya rəsmiləri bildiriblər ki, bu əməliyyat onlar tərəfindən koordinasiya edilib. Bundan əlavə, təhlükəsizlik sahəsində əməkdaşlıq çərçivəsində Nigeriyaya 100-ə yaxın ABŞ əsgəri yerləşdirilib. Lakin rəsmi Abuja bu hərbçilərin birbaşa döyüşlərdə iştirak etməyəcəyini vurğulayıb.