Ankaranın ev sahibliyində keçirilən sammitinde çıxış edən NATO Baş katibi Mark Rutte, Avropa İttifaqı Şurasının sədri Antonio Kosta və Aİ Komissiyasının rəhbəri Ursula fon der Lyayen jurnalistlərə mühüm açıqlamalar veriblər. Tərəflər çıxışlarında transatlantik tərəfdaşlıq, Rusiya təhlükəsi və Avropanın müdafiə sənayesinin gücləndirilməsi mövzularına toxunublar.
Mark Rutte qeyd edib ki, infrastruktur, güclü hərbi sənaye və maliyyə resursları NATO-nun dözümlülüyünü təmin edən ən mühüm amillərdir. Aİ-nin bu öhdəliklərə sadiqliyini yüksək qiymətləndirən Mark Rutte İttifaqın 27 üzvündən 23-nün həm də NATO üzvü olduğuna diqqət çəkib. Mövcud geosiyasi təhdidlərə toxunan Baş katib deyib: "Biz Rusiya təhlükəsi ilə üz-üzəyik. Rusiyanın Şimali Koreya, Çin və İranla əməkdaşlıq etdiyini bilirik. Birliyimizi qorumalıyıq və hazırda məhz bunu edirik".
Aİ Şurasının sədri Antonio Kosta isə NATO və Aİ arasındakı strateji əməkdaşlıqdan məmnunluğunu ifadə edərək üzv ölkələrin üzərinə düşən öhdəlikləri yerinə yetirdiyini bildirib. Avropanın öz təhlükəsizliyi üçün daha çox məsuliyyət daşımalı olduğunu qeyd edən Kosta deyib: "Avropa vətəndaşlarının NATO sammitindən gözləntisi güclü transatlantik münasibətlərə əsaslanan çəkindirmə gücümüz və müdafiəmiz üçün NATO-ya etibar etməyə davam edə biləcəyimizə dair aydın bir mesajın verilməsidir".
Aİ Komissiyasının sədri Ursula fon der Lyayen isə "Güclü Avropa, güclü NATO deməkdir" tezisini müdafiə edib. Avropanın müdafiə sistemindəki boşluqları doldurmaqda qərarlı olduqlarını vurğulayan Ursula fon der Lyayen bu məqsədlə 2030-cu ilə qədər hərbi sənayenin gücləndirilməsinə 800 milyard avro vəsait ayırdıqlarını açıqlayıb. O, həmçinin qeyd edib ki, əsas hədəf təkcə güclü müdafiə sənayesi bazası yaratmaq deyil, həm də döyüş təcrübəsinə və innovativ potensiala malik Ukrayna ilə birgə müəssisələrin sayını artırmaqdır.
