ABŞ prezidenti Donald Tramp mayın 24-də "Truth Social" hesabından etdiyi paylaşımda “Blokada razılaşma əldə olunana, təsdiqlənənə və imzalanana qədər tam gücü ilə qüvvədə qalacaq. Hər iki tərəf zamandan düzgün istifadə etməli və işi düzgün görməlidir. Səhvə yol verilə bilməz!” ifadələrini işlədib.
Tramp ABŞ-İran münasibətlərinin daha peşəkar və səmərəli hala gəldiyini də qeyd edərək, Tehranın nüvə silahı inkişaf etdirməməsi və ya əldə etməməsi barədə xəbərdarlıq edib.
Yaxın Şərq ölkələrinə dəstək və əməkdaşlıq üçün təşəkkür edən Tramp Avraham müqavilələri (Abraham Accords) daha geniş iştirakla bağlılığın gücləndiriləcəyini bildirib və İranın bir gün bu çərçivəyə qoşula biləcəyini irəli sürüb.
Tramp 2015-ci il İran nüvə razılaşmasını “indiyə qədər əldə olunmuş ən pis sazişlərdən biri” adlandıraraq, keçmiş prezident Barak Obama administrasiyasını nüvə silahının inkişaf etdirilməsinə yol açdığını iddia etdiyi qüsurlu bir razılaşma imzalamaqda ittiham edib.
“Yaxşı və düzgün” razılaşma
Tramp İranla hazırkı müzakirələrin daha yaxşı olduğunu və daha təsirli bir yanaşmanın tərkib hissəsi olduğunu bildirərək, bu prosesin Tehranın nüvə silahı əldə etməsinin qarşısını alacağını müdafiə edib.
Tramp mayın 24-də "Truth Social"dakı növbəti paylaşımında yazıb ki, İranla mümkün razılaşma keçmiş Prezident Obama dövründə əldə olunan və Tehranı böyük miqdarda nağd pulla” təmin edərək nüvə silahına gedən açıq bir yol” açdığını iddia etdiyi 2015-ci il sazişindən fərqli olaraq, yaxşı və düzgün olacaq.
Hazırkı müzakirələrin bunun tam əksi olduğunu söyləyən Tramp razılaşmanın hələ tam formalaşdırılmadığını qeyd edib.
Tramp danışıqları tənqid edənləri də hədəf alaraq, bu şəxslərin proses haqqında “heç nə bilmədiklərini” söyləyib və əvvəlki administrasiyalardan fərqli olaraq pis razılaşmalar əldə etmədiyini əlavə edib.
Digər tərəfdən, İran mediası mayın 24-də İran ilə ABŞ arasında mümkün razılaşmanın bəzi bəndləri ilə bağlı fikir ayrılıqlarının davam etdiyini xəbər verib.
Yarı rəsmi "Tasnim" xəbər agentliyi “Bu gün keçirilən bəzi görüşlərə baxmayaraq, ABŞ-nin İranın dondurulmuş aktivlərinin sərbəst buraxılması məsələsi də daxil olmaqla, razılaşmanın bəzi müddəalarına qarşı maneələri hələ də davam edir” ifadələrindən istifadə edib.
