YPG terror təşkilatının başçısı Suriya ordusunun bölgədə hərbi əməliyyatlara başlamasından sonra qrupun Fərat çayının qərbindəki ərazilərdən geri çəkiləcəyini irəli sürüb.
Terrorçu qrupun başçısı Ferhat Abdi Şahin verdiyi açıqlamada geri çəkilmənin 10 mart razılaşmasının şərtlərinə uyğun olaraq "xoşməramlılıq" jesti olduğunu və silahlı ünsürlərin bu gün (17 yanvar 2026) yerli vaxtla səhər saat 7:00-da Fəratın şərqinə doğru geri çəkilməyə başlayacağını iddia edib.
Qeyd edək ki, Suriya ordusu 13 yanvarda Deyr Hafir və Maskanah da daxil olmaqla Fəratın qərbindəki əraziləri terrorçuların işğalı altındakı hərbi zonalar elan edib.
Ordu Deyr Hafirdəki mülki şəxslərin müvəqqəti və təhlükəsiz şəkildə təxliyəsini asanlaşdırmaq üçün yanvarın 15-i və 16-da M15 magistral yolunda humanitar dəhliz açıb.
Yanvarın 16-da verilən açıqlamada ordu Deyr Hafirdə hədəf alınacaq terrorçuların qalaları kimi müəyyən etdiyi yerlərin xəritələrini dərc edib və mülki şəxsləri bu ərazilərdən uzaq durmağa çağırıb.
Ordu elan edilən hədəflərə qarşı əməliyyatların yanvarın 16-da yerli vaxtla saat 22:00-da başladığını açıqlayıb.
Suriya geri çəkilməni alqışlayıb
Suriya Müdafiə Nazirliyi YPG terror təşkilatının Fərat çayının qərbindəki təmas xəttindən geri çəkilmək qərarını alqışlayıb.
Nazirlik bütün şəxsi heyətin və hərbi texnikanın çayın şərqinə geri çəkilmə prosesinin tamamlanmasını yaxından izləyəcəyini bildirib.
Nazirlik həmçinin bildirib ki, bu geri çəkilmə Suriya ordusu bölmələrinin təhlükəsizliyi təmin etmək və bölgədə dövlət suverenliyini bərpa etmək üçün yerləşdirilməsi ilə eyni vaxtda həyata keçiriləcək.
Rəsmilər prosesin sakinlərin evlərinə və kəndlərinə təhlükəsiz və sürətli qayıtmasını asanlaşdıracağını və dövlət qurumlarının yenidən fəaliyyətə başlamasına imkan yaradacağını bildiriblər.
